5. oktobrī Latvejis Radeja “Klasika” raideis nu Daugovpiļs

LaKuGa 29. Septembris, 2015. gods Comments Off on 5. oktobrī Latvejis Radeja “Klasika” raideis nu Daugovpiļs
5. oktobrī Latvejis Radeja “Klasika” raideis nu Daugovpiļs

Pyrmūdiņ, 5. oktobrī, Latvejis Radeja 3 – “Klasika” ar Vaļsts kulturkapitala fonda atbolstu reikoj vēļ nabejušu akceju – “Klasikas” raideišonys vīta byus na Latvejis Radejis (LR) studeju komplekss Dūma laukumā, nu Daugovpiļs, informej sabīdryskūs medeju ziņu portals lsm.lv.

Idejis suokums vaicojams vēļ pavasarī, kod LR uzlobuoja apraidis teiklu Daugovpilī i tuos apleicīnē, palelynojūt LR1 i LR3 “Klasika” programu pīejameibu klauseituojim Latgolā – nu tuos šaļts “Klasika” Daugovpilī i tuos apleicīnē skaņ FM 88,1 MHz frekveņcē. Taišni tod LR 3 “Klasika” direktorei Gundai Vaivodei ari roduos ideja itū nūtikšonu akceņtēt ar eipaši reikuotu “Klasikas” dīnu Daugovpilī, kas byutu ari vīns nu “Klasikas” 20 godu dzimšonys dīnys akcentim.

5. oktobrī vysys dīnys garumā piec ziņu izlaidumu “Klasikas” ēterā byus īkļauti sižeti, kurūs sovys piļsātys vizitkarti dūs Daugovpilī studiejūšī, struoduojūšī i dzeivojūšī muokslinīki. Sovukuort 18.00 Daugovpiļs Universitatē suoksīs “Klasikas” rūsynuots koncerts, kas tīšraidē byus klausams vysā Latvejā, nu ar škārsteikla storpnīceibu – vysā pasaulī. Koncertu vadeis Gunda Vaivode i Orests Silabriedis, nu tīšraide i storpšaļts sarunys byus Ilzis Mednis puorziņā.

Tīšraidis koncertā, kura programa radeita cīšā kūpsadarbeibā ar Daugovpiļs Universitati i Daugovpiļs Latvīšu kulturys centru, pīsadaleis Daugovpiļs Latvīšu kulturys centra kors “Daugava” dirigenta Jevgeneja Ustinskova vadeibā, Daugovpiļs Universitatis Muzykys i muokslys fakultatis studenti i vuiceibspāki – asociātuo profesore Ilona Bagele (mecosoprans), docents Glebs Beļajevs (klavīris), vejūlis klasis asistents Igors Ozuns (alts), studenti Daiņs Skutelis (tenors), Sandis Ulpe (tenors), Jekaterina Zaļuma (klavīris), Ruslans Margevičs (klarnete), kai ari gosti nu Reigys – Latvejis Nacionaluos operys i baleta solisti Inga Šļubovska-Kancēviča (soprans), Daugovpilī dzymušais Rihards Mačanovskis (baritons) i Latvejis Nacionaluos operys i baleta solistu golvonais koncertmeistars Mārteņš Zilberts (klavīris).

Programā skanēs i latgalīšu tautys muzyka i Latgolā dzymušuo izciluo latvīšu skonraža Juoņa Ivanova opusi, kai ari Alfrēda Kalniņa, Jezupa Vītuola, Adolfa Skultis, Bruno Skultis, Artura Maskata, Sergeja Rahmaninova, Aleksandra Dargomižska, Pītera Čaikovska, Ferenca Lista i Volfganga Amadeja Mocarta muzyka.

Komentari slāgti.