Bīdreiba “LOBS” aicynoj jūs atbaļsteit video konkursā

LaKuGa 29. Septembris, 2015. gods Comments Off on Bīdreiba “LOBS” aicynoj jūs atbaļsteit video konkursā

Sovu darbeibu ir suokuse bīdreiba “LOBS”. Tuos mierkis ir dažaiduot i uzlobuot jaunīšu, bārnu i pīaugušs breivuo laika aktivitatis. Tuos pyrmais sūļs ir daleiba video konkursā “Shining Stars of Europe”. Video konkursa mierkis ir atainuot bīdreibu/cylvāku/īstuožu sadarbeibu.

“LOBS” sovā video viestej, ka taišni cylvāku sadarbeiba ir tys, kas ir pamatā vysam puorejam. “Bez draugim, saimis, mīlesteibys i tev svareigu cylvāku atbolsta vysod ir bejs gryuts dzeivē koč kū sasnīgt. I ituos vierteibys ir tuos, kas nazyud ar godim – projekti, bīdreibys ir i nav. Termeņš beidzās i sadarbeiba beidzās. Nu saime palīk vysod, pat, tod, ka tev nasaguoja, ka pīļuovi daudz klaidu, jī vysod paliks ar tevi. Partū mes naatspūguļuom, kai mes ceļom školu voi sātu, voi buļbu tolku. Kab tū vysu izcaltu, suokumā vajag saimi, kas atbolsta ideju, draugus, kas gotovi paleidzēt, cylvākus, kurus uzrunuot. Tod ari školu izceļsim i buļbys nūlasēsim,” sovu video raksturoj bīdreibys puorstuovi.

“Video ir īrunuots latgaliski, partū ka sovu volūdu ir juosorgoj i juoīt ar jū tuoļuok. A deļ tim, kas nasaprūt latgaliski, ir subtitri angliski,” par ideju stuosta autors Juoņs Jurčenko. Par video var nūbolsuot vīnu vīneigu reizi, partū tuo veiduotuoji kotru aicynoj nūbolsuot i īprīcynuot i dalinīkus, kas pīsadaleja video veiduošonā, i ari pīruodeit, ka latgaliski īrunuots video ari ir spiejeigs konkurēt Eiropys mārūga konkursā.

Par video var nūbolsuot ite (video: “The future depends on us”).

Komentari slāgti.