Daugovpiļs teatrī pyrmizruodi pīdzeivuojuse šokejūša komedeja latgaliski

Daugovpiļs teatrī pyrmizruodi pīdzeivuojuse šokejūša komedeja latgaliski

2. oktobrī iz Daugovpiļs teatra skotuvis sovu pyrmizruodi pīdzeivuojs jaunīstudiejums “Latgaliešu rulete” (rež. O. Šapošnikovs), kurs radeits piec Vasileja Sigareva lugys “Krievu loto”. Tei ir šokejūša komedeja, ar kuru Daugovpiļs teatrī teik turpynuota jau labi īsasakņuojuse tradiceja – pīduovuot profesionala teatra izruodis ari latgaliski.

Koč i izruode “Latgaliešu rulete” ir komedeja, kurymā natryukst ni ospruoteibu, ni eistyna latgalīšu humora, tei nanūlīdzami līk aizadūmuot. Smejūtīs par kuortejū situaceju, skateituojs var pamaneit, ka lugys komiskuos linejis pamatā ir jimta cylvāka dobys naparadzameiba, i nūmūka vaicuojums – voi tik itī varūni nasaruod zynomi? Puorjam sajiuta, ka verīs greizajā spīgelī, gribīs smītīs, nu dzili sirdī jiuti, ka, īspiejams, tys varātu byut stuosts ari par tevi…

“Latgaliešu rulete” pīduovoj pasavērt iz situaceju, ar kuru ir sasaskuors gondreiž sevkurs, par tū, cik pieški var izamaineit cylvāks, kod jis teik naparadzātūs apstuokļūs. Par tū, kas nūteik, kod aci pret aci sasateik nauda i draudzeiba. Sarežgeitais i patīsais – vīgli i ospruoteigi!

Kūpā ar režisoru O. Šapošnikovu izruodi paleidziejusi veiduot rodūšuo komanda – kostimu muokslinīks Egils Viļumovs i scenogrāfs Gints Sippo, kuram itei beja pyrmuo sasatikšona ar Daugovpiļs teatri, sovukuort jau ūtruo sadarbeiba ar izruodis režisoru O. Šapošnikovu. Juopīmiņ, ka lugu nu krīvu volūdys tulkuojuse Daugovpiļs teatra aktrise K. Veinšteina, kura vēļ ari spielej golvonū lūmu itamā izruodē. Lūmuos īsadzeivuojuši ari vēļ seši Daugovpiļs teatra akteri: E. Viļumovs, M. Kuorkliša, R. Gailums, L. Ivanova, M. Korsiets i M. Abramovs.

Daugovpiļs teatra komanda skaita, ka sevkurā liktiņa pīspālātā situacejā svareiguokais ir prīcuotīs par dzeivi, i izruode “Latgaliešu rulete” spiej duovuot na mozums šaļtu smīklu i vīnkuoršu, nadaudz ironisku smaidu pošim par sevi.

Foto: Sandra Rogozina

Tyvuokuos izruodis  – 30. oktobrī 18.30 i 27. novembrī 18.30.

Beleti – Daugovpiļs teatra kasē (654 26520) i škārsteiklā.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]