Preiļūs apsaverama J. Pīguožņa plenera dalinīku izstuode

LaKuGa 7. Oktobris, 2015. gods Comments Off on Preiļūs apsaverama J. Pīguožņa plenera dalinīku izstuode

Nu 14. da 18. septembra Preiļūs nūtyka pyrmais Jezupa Pīguožņa vuordā nūsauktais muokslinīku pleners. Tys nūsaslēdze ar “Jāzepa Pīgožņa balvas par Latvijas ainavu glezniecībā” padūšonys ceremoneju 19. septembrī Preiļūs, informej J. Pīguožņa meita Īva Pīguozne. Da 7. novembra Preiļu kulturys noma izstuožu zalā apsaverama plenera dorbu izstuode.

Itūgod pyrmū reizi jau par tradiceju palykušais gleznīceibys pleners Preiļūs beja veļteits pyrma goda viņsaulē aizguojušajam izcilajam ainovu gleznuotuojam Jezupam Pīguoznim. Plenerā pīsadaleja “Jāzepa Pīgožņa balvas par Latvijas ainavu glezniecībā 2015” sajiemiejs Roberts Muzis, Jezupa Pīguožņa meita muokslineica Laura Pīguozne, bolvys idejis autori Juoņs Anmanis i Juoņs Streičs, kai ari muokslinīki, kuri kūpā ar Jezupu Pīguozni pīsadalejuši plenerūs Latvejā i uorvaļstīs. Latgolu itūgod puorstuovēja Osvalds Zvejsaļnīks, Juoņs Plyvda, Ilze Griezāne, Vēsma Ušpele, Vija Stupāne, Agra Ritiņa. Dalinīku vydā beja ari taidi Latvejā zynomi muokslinīki kai Ligita Caune, Nugzars Paksadze, Signe Vanadziņa, Inga Jurova, kai ari muokslinīks Jonass Pleckevičius nu Lītovys. Pleneru organizēja Preiļu viesturis i lītiškuos muokslys muzejs, finansēja Preiļu nūvoda dūme.

Plenera nūslāgums nūtyka 19. septembrī Preiļu kulturys nomā reizē ar “Jāzepa Pīgožņa balvas par Latvijas ainavu glezniecībā” padūšonys ceremoneju. Bolvys laureats Roberts Muzis sajēme Preiļu nūvoda dūmis finansātū bolvu, kai ari zalta medaļu, kurys autors ir Juoņs Strupulis. Pasuokumu vadeja Preiļu gūda pylsūņs kinorežisors Juoņs Streičs. Muzicēja bungu i dyudu muzykys grupa “Auļi”. Projektu atbaļsteja ari Vaļsts Kulturkapitala fonds.

Ar bolvys padūšonu nūsaslēdze ari ceļojūšuo izstuode, kurā beja apsaveramys daudzu autoru gleznys, kuruos pīsadaleja konkursā par lobuokū Latvejis ainovu. Ituo gods martā izstuode tyka atkluota Reigā, Pīterbazneicā, kur ari tyka paziņuots tuos uzvarātuojs.

Izstuode, pleners i bolvys padūšona Preiļūs aplīcynoj Preiļu kai spareiga, idejom boguota i muokslys procesus veicynūša kulturys centra nūzeimi Latgolā. “Jāzepa Pīgožņa balvu par Latvijas ainavu glezniecībā” itūgod īdybynuoja Preiļu nūvoda dūme sadarbeibā ar Reigys dūmi, Latvejis Zynuotņu akademeju, Latvejis Muokslys akademeju i LBJMFA Juoņa Anmaņa Jaunūs talantu atbolsta fondu, kab veicynuotu muokslinīku interesi gleznīceibā atveiduot Latvejis dobu i izcaltu Latvejis ainovu gleznīceibys nūzeimi Latvejis myusdīnu muokslā. Bolvu paradzāts padūt kotru godu.

20151005_plenera_izstade

Komentari slāgti.