Teik veiduota gruomota par Terēzi Broku

LaKuGa 8. Oktobris, 2015. gods Comments Off on Teik veiduota gruomota par Terēzi Broku

Daugovpiļs piļsātys dūmis Kulturys puorvaļde, sasadorbojūt ar literati i žurnalisti Annu Rancāni, ir suokuse dorbu pi pietnīciskuo dorba veikšonys i materialu apkūpuošonys, kas piečuok tiks izmontuots gruomotys par Terēzi Broku veiduošonā, informej Daugovpiļs piļsātys dūmys Kulturys puorvaļdis puorstuove Vita Viļevko.

tereze brokaPasasokūt Vaļsts Kulturkapitala fonda mierkprogramys “Latvijas valsts mežu atbalstītā Latgales kultūras programma 2015“ atbolstam Daugovpilī teik realizāts projekts “Pētnieciskā darba veikšana un materiāla apkopošana par Terēzi Broku un viņas ieguldījumu Latgales koru mūzikas attīstībā”. Projekta mierkis ir nūdrūšynuot Latgolys kulturys montuojuma, vierteibu, tradiceju saglobuošonu i atteisteibu, veicūt pietnīciskū darbeibu i materialu apkūpuošonu par Terēzi Broku i juos īguļdejumu Latgolys kora muzykys atteisteibā.

Projekta realizacejis laikā teik īvuoktys mutvuordu i dokumentaluos līceibys, kū dūd i poša Terēze Broka, i ari juos kolegi, koru dzīduotuoji, kulturys darbinīki, rodi i cyti cylvāki, kas nazkod ir sasadorbuojuši voi sasadorboj ar dirigenti, kai ari atlaseiti Rakstnīceibys i muzykys muzeja, Latvejis Vaļsts arhiva, S. Broka Daugovpiļs Muzykys vydsškolys i cytu īstuožu arhivu dokumenti i fotografejis, sajimtais materials byus cīši apjūmeigs i daudzpuseigs, tai ļaunūt pīfiksēt na tik muokslineicys biografiskūs faktus i atspīgeļuot juos īguļdejumu Latgolys kora muzykys atteisteibā, nu ari atkluot unikaluos personeibys daudzpuseibu.

Projekta realizātuoji aicynoj izcyluos dirigentis i pedagogis školānus, kolegus, laikabīdrus i cytus interesentus īsasaisteit materialu apkūpuošonā i īsyuteit sovys līceibys, fotografejis par Terēzis Brokys rodūšū darbeibu. Materialus gruomotys veiduotuoji prīcuosīs sajimt da 2015. goda 1. decembra iz e-postim anna.rancane@gmail.com voi vita.vilevko@daugavpils.lv.

Dirigente i pedagoge Terēze Broka ir vīna nu rodūšuokūs i izcyluokūs personeibu, kura ir davuse lelu īguļdejumu Latgolys i Latvejis kulturvidis saglobuošonā i atteisteibā. Bez juos pādejūs 60 godūs nav īdūmuojama Latgolys kora muzykys atteisteiba. Zeimeigai, ka taišni itymā, 2015. godā, kod Latgolys dzīšmu svātki svietej sovu 75. godadīnu, sovu 90 godu jubileju svietej ari Terēze Broka.

Foto: Publicitatis karteņa

Komentari slāgti.