“Laimas Muzykanti” sovu koncertturu suoks Rēzeknē

LaKuGa 13. Oktobris, 2015. gods Comments Off on “Laimas Muzykanti” sovu koncertturu suoks Rēzeknē

Etnoroka grupa “Laimas Muzykanti” 16. oktobrī ar skaneigu koncertu Latgolys viestnīceibā GORS suoks jubileja koncertturu “Atdot tautai tautasdziesmu”.

Vaicuots par sajiutom pyrma koncerta, grupys līders Artūrs Uškāns soka: “Rēzekne ir myusu ar Intu (Artūra dzeivisbīdre, kura ari spielej grupā “Laimas Muzykanti”) dzymtuo piļsāta – ite dzeivoj myusu mamys, rodi, draugi, školuotuoji, školysbīdri i muni bruoli. Ite aizasuoce myusu školys i dorba gaitys, tyka īvuiceiti pyrmī muzykys pamati, partū atbiļdeiba pret Rēzeknis publiku ir naīdūmuojami lela. Kotru reizi, spielejūt Rēzeknē, cīši uzatraucu, partū ka sovejim spielēt ir vysgryušuok – atsarūnūt iz skotuvis, esi gotovs atdūt vysu, kab tik īprīcynuotu sovus meiļūs… I, prūtams, ka koncerts izadūd, tod ari atdeve i sirsneiba nu Rēzeknis publikys ir taida, kai nikur cytur Latvejā voi pasaulī. Mes niu cīši ceņteigai struodojam, kab koncerts dzymtajā piļsātā byutu lobuokais vysā “Laimas Muzykantu” 20 godu viesturē!”

Lelkoncertā “Atdot tautai tautasdziesmu” grupa klauseituojim duovuos skaistuokuos latgalīšu i latvīšu tautysdzīsmis. Programā byus dzierdamys i vysim meilys i leidza dzīžamys dzīsmis, i dzīsmis nu jaunuo albuma “Rodi”.

Koncertā pīsadaleis grupys ilggadiejuo dalineica Latvejis etnomuzykys personeiba Kristīne Kārkle, latvīšu estradis dīva Olga Rajecka i 80. – 90. godu muzykys legenda – grupa “Elpa”!

“Jau pats koncerta nūsaukums – “Atdot tautai tautasdziesmu” mudynoj atguoduot, ka myusu tautai ir dzīsmis, kas godu symtim caur paaudzem kruotys i sleipietys da briļjanta myrdzuma. Tei zynomā mārā ir atsagrīsšona pi sakņu, partū ari koncertturs teik suokts taišni Rēzeknē – Latgolys sirdī,” uzsver grupys “Laimas muzykanti” līders Artūrs Uškāns.

Koncerta laikā varēs nūpierkt jaunuokū “Laimas Muzykantu” albumu “Rodi”.

Koncerts nūtiks 16. oktobrī 19.00. Beletus var īsaguoduot “Biļešu paradīzes” kasēs voi škārsteiklā.

plakats

Komentari slāgti.