Gruomotā izdūtys Danskovītis komedejis

LaKuGa 14. Oktobris, 2015. gods Comments Off on Gruomotā izdūtys Danskovītis komedejis

danskovite gruomotaVīnā gruomotā izdūtys Danskovītis komedejis “Ontans i Anne” ostonis dalis.

Danskovīte (Anita Ločmele) dzymuse 1961. godā Baļtinovys pogosta Dansku cīmā. Vuicejusēs Piļskolna pamatškolā, tod Baļtinovys vydsškolā, kuru beiguse 1979. godā. Nu 1981. da 1986. goda studējuse LVU Filologejis fakultatē latvīšu volūdys i literaturys nūdaļā. Piec augstškolys atsagrīzuse dzymtajā pusē i struodoj Baļtinovys vydsškolā par latvīšu volūdys i literaturys školuotuoju. Ir diveju dālu i diveju meitu muote, nu jau ari baba. Cīši pateik ceļuot i skaiteit gruomotys, tik kasdīnys dorbi i steiga na vysod ļaun tū realizēt. Interesej floristika, ezoterika i izšyušona. Ritini skaita par uztycamuokū transporta leidzekli, nu dzeivi navarātu īsadūmuot bez sova sakņu i puču duorza.

Daudzus godus vadejuse školys teatra puļceņu, rakstejuse skečus vysaidim pasuokumim, bet nu 2000. goda ir Baļtinovys amatīrteatra “Palādas” vadeituoja. Ar teātri izspālāti daudzu autoru dorbu, cikom beja daguojs laiks suokt sovu lugu raksteišonu. Leluoka skaiteituoju atsauceiba bejuse latgaliskajom izruodem, partū ari tyka radeita luga “Ontans i vampiri”, kurys pyrmizruode nūtyka 2001. goda Leldīnēs. Cylvāki īmeiļuoja lugys varūņus, dzeivuoja leidza jūs prīcom i bādom. Itai daļai sekuoja cytys, cikom saguoja vasals serials ar nūsaukumu “Ontans i Anne”. Publikai ruodeitūs lugu skaits nu ituo seriala teatrim “Palādas” jau tyvojās 500. izruodei. Ari Latvejis Nacionalais teatris izalaseja 6 dalis, i režisors Valdis Lūriņš izveiduoja divejis izruodis: “Latgola.lv” 2010. godā i “Latgola.lv 2” 2014. godā.

Tyka raksteitys ari cytys lugys: “Sīvasmuotes senču laiki” (sastuov nu treis patstuoveigu lugu), “Tāva meitas”, “Prece ai zatanu”, “Lauku kurorts piļsātnīkim”, “Gosta gosts”, “Pareizuo stidzine”, “Sadzeivuosem!”, “Duorgīs pierkums”.

Pasasokūt dzejnīkam Ontonam Slišānam, 2008. godā izguoja Danskovītis lugu kruojums “Lugas”, tok tī ir tik puse nu nūsauktūs dorbu.

2006. godā A. Ločmelei teik pīškierta Kulturys ministrejis premeja par spylgtu davumu sova nūvoda mentalitatis populariziešonā.

2008. godā padūd Latgolys planavuošonys regiona Atzineibys rokstu par Latgolys tāla veiduošonu vaļstī i pasaulī.

2008. godā Anita Ločmele ir amatīrteatru konkursa “Gada izrāde 2008” laureate nominacejā “Gada labākā aktrise”.

2010. godā jei sajēme Boņuka bolvu nominacejā “Goda cylvāks”, nu 2011. godā teik pīškierta AKKA/LAA Autortīseibu bezgaleibys bolva.

2015. godā izdūtajā gruomotā “Latvijas novadu dārgumi” par Baļtinovys duorgumu atzeita Dankovītis lugys izruode Latvejis Nacionalajā teatrī “Latgola.lv”

Karteņa: nu veikala “OMarta” facebook profila

Komentari slāgti.