Kubulūs nūtiks dzeivuos muzykys grupu festivals “Savējie 2015”

LaKuGa 15. Oktobris, 2015. gods Comments Off on Kubulūs nūtiks dzeivuos muzykys grupu festivals “Savējie 2015”

6. novembrī Bolvu nūvoda Kubulu kulturys nomā nūtiks trešais dzeivuos muzykys grupu festivals “Savējie 2015”, informej pasuokuma organizators Māris Lāpāns.

Pyrmī diveji festivali ir paguojuši cīši aizraujūšā i energiskā jutūnē, kas teik prognozāta ari itūgod. Festivalā pīsadaleis  9 grupys: “Kiwi” nu Varakļuonu, “Ilūzija” nu Viļānu, “Unknown Artist” nu Upeitis, “D- Light” nu Preiļu, “Mani Mākoņi” & Dagmāra Laicāne nu Bolvu, “Napruots” nu Rekovys, “Alu Cilvēki” nu Bolvu, “Sikspārnis” nu Kubulu, kai ari nazkod zynomuo grupa “Ferrum” nu Ciesim, kas ir otkon apsavīnuojuse piec apmāram 20 godu klusiešonys pauzis.

Kotra grupa uzastuos ar pusstuņdi garu programu. Tūs izpiļdejumā byus dzierdamys i originaldzīsmis, i latvīšu šlageru i pop muzyka, kai ari latgaliskuos roka muzykys intonacejis i pasauļa popmuzyka. Piec grupu uzastuošonys paradzāts ari “jam session”, kur dažaidu grupu muziki bez īprīškejuos mieginuošonys vīnuosīs kūpeigā improvizātā muziciešonā. Darbeiba nūtiks iz diveju ar kvalitativu skaņu i gaismu apreikuotu skotuvu. Dorbuosīs ari kopejneica.

Īīšonys moksa festivalā da 22.00 byus 4 eiro, piečuok – 5 eiro.

SAVEJIE2015

Komentari slāgti.