Izdūts folklorys kūpys “Upīte” pyrmais albums

LaKuGa 26. Oktobris, 2015. gods 1

CD vuoks_Upīte21. oktobrī J. Vītuola Latvejis Muzykys akademejā ar stuostejumu par Zīmeļlatgolys tradicionaluos kulturys montuojumu i dzīšmu izdzīduošonu tyka īskandynuots ari folklorys kūpys “Upīte” pyrmais albums “Vusi ļauds breinovuos”, kurymā vydā ir 14 Zīmeļlatgolys (Škilbānu pogosta) tradicionalūs dzīšmu i vīnys dzīsmis myusu dīnu verseja.

Etnomuzikologe Anda Beitāne par Upeitis jaunīšim i izdūtū īrokstu soka: “Folklorys kūpa “Upīte” izauguse nu Upeitis bārnu folklorys kūpys, bārnim kliustūt par jaunīšim, ar kurim kūpā mieginuojumūs niu jau pīsadola jūs pošu bārni. Jaunīšu kūpa patstuoveigi dorbojās nu 2005. goda, kod tuos vadeibu uzajieme Santa Matisāne. Kai saceits Bolvu regiona kulturviesturis datu bazē, itaida dorbuošonuos Upeitis jaunīšus izvadynuoja iz pastuoveigu darbeibu tradicionaluos kulturys saglobuošonā i aktivu folklorys propogandu. Jī, koč sovu studeju i dorba saisteibu vadeiti izkaiseiti pa vysu vaļsti, regulari saīt Upeitis tautys nomā iz mieginuojumim, svietej kūpeigi jubilejus i tradicionalūs svātkus, kur vysod gūdā teik turāta folklora. Upeitis jaunīšus par itū jūs mīlesteibu iz sovu tradicionalū namaterialū kulturys montuojumu daudzi apskauž i daudzi prīcojās. Nu 2007. goda decembra kūpu voda Andris Slišāns, jiutami uzlobojūt jaunīšu aktivitati.

Sovu repertuaru folklorys kūpa “Upīte” veidoj, īsavuicūt tautysdzīšmu dzīduošonys muoku i tautys danču doncuošonys veidu bez pastorpynuojumu, taišni vuicūtīs nu teicieju Upeitis i Škilbanu pusē. Leluokuo daļa kūpys daleibnīku jau nu agrys bierneibys dorbuojušīs Upeitis etnografiskajā ansamblī i Upeitis bārnu folklorys kūpā. Jī pīdar i īsadar taišni Upeitē – vidē, kur tradicionaluo kultura napagaist, a, sokūt paļdis jim, turpynoj dzeivuot napuortrauktā tradicejā.

Albumā vydā daliktuos dzīsmis eistyn var saukt kai Upeitis skaistuokuos pērlis. Tuos veidoj Škilbanu pogosta tradicionalūs bolsu kūdulu, kū jī gon dzeivā veidā puormontuojuši nu sovys pusis vacuokūs dzīduotuoju, gon ari īsavuiciejuši nu viesturiskūs īrokstu, kurūs 1971. godā magnetapona lentē fiksieja tradicionaluos kulturys entuziasts, dzejnīks, publicists i vītejuos viesturis pietnīks Ontons Slišāns kūpā ar pravestu Mikeli Jermacānu. Dzīsmis “Vusi ļauds breinovuos” i “Kur tu skrīsi, vanadzini”, Slišāna piezeimēs sauktys ari par “Vosaras bolsim”, kas vaira kai 40 godu guliejušys īrokstūs i transkripcejuos, ar ituo albuma izīšonu dabuojušys jaunu dzeivi, atdzymstūt Upeitis jaunuokuos paaudzis dzīduotuoju bolsūs. Ir piļneigi saprūtams, ka Upeitis tradicionaluos muzykys montuojums ir drūsuos rūkuos.”

Albumā vydā atrūnoms ari Artūra Slišāna myusu dīnu skatejums iz dzīsmi „Kur tu skrīsi vanadziņi”, kurs ituo goda vosorā beja vīna nu spālātuokūs dzīšmu Latvejis Radejis ūtrajā programā.

7. novembrī 19.00 folklorys kūpa „Upīte” aicynoj gostūs iz Zīmeļlatgolu, kab sovā dzymtajā cīmā īskandynuotu albumu ari ar koncertu, pīsadolūt kūpys draugim, i piečuokū balu.

Albuma izdūšonu atbaļstejs Vaļsts kulturkapitala fonds. Dreiž ar fonda atbolstu tiks izdūts ari folklorys kūpys “Upīte” DVD disks ar Zīmeļlatgolys tradicionalajom dejom.

Viesti sagataveja Edeite Husare

Komentari slāgti.