4. novembrī 11.30 Latgolys puorstuovnīceibā (Tūrņa īlā 4 IIIC 102, Reigā) nūtiks gruomotys “Latgales sirdspuksti” atkluošonys pasuokums, informej bīdreibys “Balvu olūts” vaļdis prīšksādātuoja  Zanda Arnicāne.

Bīdreiba “Balvu olūts” unikalā dzejis i foto gruomotā “Latgales sirdspuksti” apkūpuojuse 150 Latgolys dzejnīku i fotografu dorbus nu vysu 20 Latgolys nūvodu i 2 piļsātu pošvaļdeibu.

Gruomotys veiduotuoji soka, ka tuos pīvīnuotuo vierteiba ir tei, ka teik apvīnuoti vysaidu tauteibu cylvāki i atspīgeļuota Latgolys patīsuo byuteiba, tuos dvēsele. Dzejūli tamā ir latvīšu literarajā, latgalīšu, krievu i pat boltkrīvu volūdā. Itei gruomota veidoj tyltus storp dažaidom sabīdreibys grupom, izceļūt pošu svareiguokū – mīlesteibu pret Latgolu. Kūpdorbs “Latgales sirdspuksti” ir breineigs pīmārs tam, ka, nasaverūt iz kulturalajom, nacionalajom i religiskajom atškireibom, vysi dzeivuotuoji lepojās ar sovu skaistū Latgolu i paleidz tai byut par syltu sātu vysim.

Gruomotai “Latgales sirdspuksti” ir na tik kulturviesturiska, nu ari politiska i simboliska nūzeime. Tei ir myusu dīnu Latgolys vizitkarte, i tū ir nūviertiejuši albuma atbaļsteituoji: Bolvu, Cyblys, Dagdys, Kuorsovys, Kruoslovys, Krystpiļs, Viļakys, Viļānu, Zylupis nūvodu pošvaļdeibys i Rēzeknis piļsātys dūme.