Toronto ES kinu festivalu atkluos “Segvārds Vientulis”

Toronto ES kinu festivalu atkluos “Segvārds Vientulis”

vientulis28 vaļstu konkureņcē, kai vīneiguo kina nu Latvejis, itūgod Toronto Eiropys Savīneibys kinu festivalā pīsadola i tū ari atkluos Latvejā radeituo Normunda Puča kina “Segvārds Vientulis”.

18. kasgadejais Toronto Eiropys Savīneibys kinu festivals itūgod nūtiks nu 14. da 28.novembra i tymā pīsadola 28 jaunuokuos i atzeituokuos kinys nu Eiropys Savīneibys vaļstim. Festivala atkluošonys pasuokums i kinys “Segvārds Vientulis” seanss nūtiks 14. novembrī “Mod Club” Toronto. Sovukuort festivalā Otavā kina tiks izruodeita 22. novembrī, nu Vankūverā 5. decembrī.

Kinys režisors Normunds Pucis, kurs pīsadaleis ari tuos izruodeišonā Toronto festivalā, par sovu dorbu soka: “Tys ir stuosts par cylvāka dzeivis eksistencialajom izvielem, kuruos ir vīnleidz aktualys sevkurūs viesturiskajūs apstuokļūs. Uzticeiba i varūneiba, kurai kluotyn ir ari nūdeveiba i gļāvums voi gribiešona vīnkuoršai izdzeivuot – tū vysu var īpazeit, sekojūt Ontona Juhneviča i juo ceiņu bīdru liktinim kinā. Asmu gondareits, ka kina teik izruodeita vys leluokai auditorejai, partū ka tei ir vareiba izstuosteit daļu nu myusu Latvejis stuosta ari leluokam pasauļam.”

Dokumentaluo spēļkina “Segvārds Vientulis”, kuruos pyrmizruode Latvejā nūtyka paguojušuo goda novembrī, ar panuokumim ir pīsadalejuse i prestižūs Latvejis, i storptautyskūs kinofestivalūs. Ituo gods pavasarī “Segvārds Vientulis” pīsadaleja Kannu kino festivala “Marche du film” kinu tiergā i tyka demonstrāta Eiropys Parlamentā Briselē, kai ari izruodeita Īrejis sabīdreibai i myusu tautīšu kūpīnai Dublinā i Limerikā. Sovukuort pavysam naseņ 27. Nacionalajā kinu festivalā “Lielais Kristaps” kinys skaņu režisors Andris Barons sajēme bolvu nominacejā “Labākais skaņu režisors”.

Tī, kuri da šam nav paspiejuši nūsavērt kinu “Segvārds Vientulis”, tū varēs izdareit Vaļsts svātku laikā nu 8. da 18. novembra Reigā, Cafe Film noir (“Splendid Palace”), kai ari 17. novembrī Rēzeknis Augstškolā i 23. novembrī Ludzā.

Kina “Segvārds Vientulis”, kuruos darbeiba rysynojās Leivuona apleicīnē 1945. godā, ir iz patīsu nūtikšonu baļsteits emocionals stuosts par nacionalūs partizanu organizacejis darbeibu Latgolā i tuos goreigū vadeituoju katuoļu prīsteri Ontonu Juhneviču.

Viesturiskuos personys kinā atveidoj akteri Varis Piņķis, Viļs Daudziņš, Edgars Samītis, Andris Bulis, Jurs Bartkevičs, Jurs Jope, Edgars Pujāts, Rihards Rudāks, Māris Korsietis, Egils Viļumovs, Ritvars Gailums i Valdemārs Karpačs. Sovukuort muzyku kinai ir sarakstejs storptautyskai atzeitais latvīšu goreiguos muzykys komponists Rihards Dubra.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]