Etnorokeri nu Latgolys – “Laimas Muzykanti” – 20 godu pastuoviešonys laikā apceļuojuši daudzys pasauļa vaļsts, nu jubileja koncerttura laikā pabejuši vysūs Latvejis nūvodos. 28. novembrī jī ir gotovi pīskandynuot golvyspiļsātu, kur koncertzalā “Rīga” nūtiks lelkoncerts “Atdot tautai tautasdziesmu”.

Programā skanēs dzīsmis nu “Laimas Muzykantu” senejuoka repertuara, popularuokuos latgalīšu i latvīšu tautysdzīsmis, kai ari dzīsmis nu jaunuo albuma “Rodi” i pyrmatskaņuojumi. Koncerts Reigā byus sirsneigs i eipašs, partū ka tymā kūpā ar “Laimas Muzykantim” uzastuos jūs draugi – latvīšu estradis muokslineica Olga Rajecka, jaunuo, talanteiguo etnodzīduotuoja Leila Alijeva, kurei sovā daiļradē apvīnoj latvīšu i azerbaidžaņu muzykaluos tradicejis, i “Iļģi”.

Grupys “Laimas Muzykanti” liders Artūrs Uškāns pastreipoj: “Pyrma svātdiņ īdegsim pyrmū sveceiti Adventa vaiņukā, aicynoju reidzinīkus sastdīnis vokorā izbaudeit grandiozu folklorys šovu, kū veidoj boho stila skotuvis tārpi (muokslineica Olga Gžibovska), videomuokslinīku Gunta Kaminska i Vasileja Šilova veikums, kai ari iz skotuvis i aizskotuvē struodojūšī 30 cylvāki! Ar koncertu grybom paruodeit, ka tautysdzīsmei nav vīta tik arhivūs i folklorys festivalūs, tei var byut ari kruošņa i myusdīneiga. Dasaceišu viņ, ka tys nav tik izklaidis, nu ari kulturys pasuokums, partū, taipat kai vysūs īprīškejūs tura koncertūs, dorbuosīs Latgolys Studentu centra gruomotu golds, kur varēs īsapazeit ar jaunuokū Latgolys literaturu, skaņu īrokstim i, prūtams, ar lelu atlaidi nūpierkt myusu jaunuokū albumu “Rodi”.

Koncerts nūtiks 28. oktobrī, suokys – 19.00. Beletus īspiejams nūpierkt “Biļešu paradīzes” kasēs voi škārsteiklā.