Latgolys Kulturviesturis muzejs da 30. janvara apmaklātuojim pīduovoj Guļbinis piļsātys kulturys centra Tautts lītiškuos muokslys studejis “Sagša” vysaiduos tehnikuos darynuotu lītiškuos muokslys i omotnīceibys rūkdorbu izstuodi “Četras krāsas”, informej studejis vadeituoja Biruta Akmentiņa.

Nu 1952. goda Guļbinis kulturys centra Tautys lītiškuos muokslys studejis “Sagša” meistari Guļbinis nūvodā nūdrūsynoj namaterialuo kulturys montuojuma dzeivuotspieju, pietnīceibu, populariziešonu i nūdūšonu tuoļuok. Itūšaļt studejā dorbojās 25 meistari – audiejis, adeituojis, rūkdorbneicys, keramike i kūkapstruodis meistars.

Ceļā iz Latvejis naatkareibys symtū godadīnu i Vyspuorejim latvīšu Dzīšmu i deju svātkim TLMS “Sagša” 2014. godā Guļbinis nūvodā īsuoce kusteibu “Darini savu tautas tērpu”, kuruos rezultatā studejā īguoja jauna paaudze, partū dorba sezonys golvonais aizdavums – vuiceitīs ausšonys teoreju i praktiskuos nūdarbeibuos īsavuiceit ausšonys, izšyušonys, mežgiņu zeču adeišonys prasmis.

Īsadvasmojūt nu Krystpiļs vylnaiņu, cymdu i zeču rokstu kruosu salykumu, roduos jaunuokuo lynu dvīļu kolekceja “Četras krāsas”. Tradicionalī roksti palyka kruosaini, žylbynūši i dzeivisprīceigi. Kruosu gammu izstuodē paspylgtynoj tradicionalī audakli – placu lokoti, tautiskuos jūstys, vylnys deči i lynu goldauti. Adejumi, keramikys i kūka izstruoduojumi akcentej formu i fakturu daudzveideibu.

Ar devizi “tradicionalais – myusdīneigi, rodūši i meistareigi” studeja vierš sabīdreibys viereibu latvīšu tautys kulturviesturiskuo montuojuma nūzeimeigumam. TLMS “Sagša” Birutys Akmentiņys vadeibā dorbojās rūku dorba prasmu saglobuošonys projektūs, reikoj tematiskuos sezonys izstuodis, organizej i īkuortoj Guļbinis nūvoda muokslys omotnīceibys izstuodis, pīsadola Latvejis Nacionaluo kulturys centra i sova nūvoda reikuotajūs pasuokumūs, organizej rodūšuos darbneicys. Studeja ir Tautys muokslys savīneibys bīdre.