Jau divpadsmytū godu tyka padūtys akcejis “Latvijas lepnums” bolvys 10 nominacejuos. Tuos pīškir cylvākim, kurī kasdīnā spiej īdvasmuot ar sovu pošaizlīdzeibu, nasavteibu, kai ari motiviejuši dzeivē sasnīgt vaira i napasadūt, ar sovim dorbim gluobūt i dzeiveibys, i dzeivisprīcu leidzcylvākūs, tai vairuodami lobū vysā vaļstī. Ari itūgod laureatu vydā beja latgalīši.

Nominacejā “Caur ērkšķiem uz zvaigznēm” bolvu sajēme Pīters Augstkalns nu Tiļžys pogosta. Nu 26 godu vacuma Pīters ir piļneigi naredzeigs. Dzeive ar tū nav apsastuojuse. Jis ir izaudzynuojs divejus bārnus i nu jau ryupejās par pīcom mozmeitom, apsaimnīkoj 130 bišu saimis i zīmys sezonā veic masīra dorbu – sovus klientus jis īdvasmoj i motivej napasadūt, kai ari ticēt sovim sapynim.

Nominacejā “Skolotājs” bolvu sajēme Aglyunys Kora školys dybynuotuoja Īva Lazdāne. Īvys dybynuotuo škola ir vīneiguo taida veida škola Latvejā, Īva tū veiksmeigi popularizej vysā pasaulī. Jau dīnu piec bolvys sajimšonys jei ar Aglyunys bazilikys Kora školys grupu brauce iz Rūmu, kab pīsadaleitu Vyspasauļa bārnu i jaunīšu koru federacejis “Pueri Cantores” 40. kongresā – festivalā, sasatyktu ar pavestu Francisku, kūpā ar 127 cytim korim nu vysa pasauļa dzīduotu dīvkolpuojumūs Rūmys bazneicuos i poša pavesta celebrātajā Sv. Mišā Sv. Pītera bazilikā. Jei teik raksturuota kai eistyna latgalīte, kurei ar sovu attīksmi i dorbim vuica bārnim cīnu pret latgalīšu volūdu i kulturu.

Akceju “Latvijas lepnums” organizej laikroksts “Diena” i telekompaneja TV3 ar Reigys Breivūstys puorvaļdis un Vaļsts akceju sabīdreibu “Latvijas dzelzceļš” i “Latvijas pasts” guodeibu.