Izdūts albums “Dzīsmis ap Dīva Pīdzimšonu”

Izdūts albums “Dzīsmis ap Dīva Pīdzimšonu”

Taišni pyrma Zīmyssvātku aba Dīva Pīdzimšonys laika izguojs jauns vierteigs audio īroksts – albums “Dzīsmis ap Dīva Pīdzimšonu”, kuruo prezentacejis nūtikšona byus 10. janvarī Bolvūs. Albumā atrūnomys 14 senejuos katuoļu Zīmyssvātku dzīsmis, kuruos īdzīduojuse Vactiļžys pogosta folklorys kūpa “Saime”.

Albuma idejis autors i izdeviejs bazneickungs Aigars Bernāns par īrokstu soka: “Nu aizmiersteibys asam cāluši senejus vuordus i bolsus, kū modernais pasauļs jau ir aizmierss. Myusu vacī ļauds juos zynuoja iz pruota i Zīmyssvātku laikā dzīduoja na tik Latgolys bazneicuos, a i sātā voi īdami cyts iz cytu gostūs kaladuot. Vairuokuos paaudzēs ituos Zīmyssvātku dzīsmis Latgolys katuolim beja vīneiguos, cikom 20. gs. 30. godūs pasaruodeja jaunuokys, kuo melodejis niu pazeist vysa Rītumeiropa i vēļ tuoļuok. Vacuos bazneicys dzīsmis ap Dīva Pīdzimšonu tyka napeļneiti aizmierstys. Patīseibā juos ir unikala vierteiba, kas latgalīšūs veiduoja pīdareibys sajiutu na tikai Dīvam, Bazneicai, sovai saimei, a i myusu Latgolai. Turu nūceju, ka itys albums vacajom dzīsmem paleidzēs atsagrīzt, varbyut pat pagrīzs juos jaunai i vēļ garuokai dzeivei, skubynuos myus vuiceitīs dzīšmu vuordus i bolsus.”

Dzīšmu melodejis, vuordus i senejū dzīduošonys veidu bazneickungs vairuoku godu garumā savuocs pi teicieju kai ekspedicejā Sibirī, tai i dažaiduos Latgolys vītuos – Pīneņūs, Smeļterūs, Baļtinovā i Vactiļžā. Albumā “Dzīsmis ap Dīva Pīdzimšonu” īkļautuos dzīsmis nav vīneiguos, kurys seņuok dzīduotys itymā svātku laikā, bet izlasis izdeviejs tur nūceju, ka varbyut itam pyrmajam sūļam iz vacūs dzīšmu atdzimšonu byus vēļ cyti. Taipat leidzeigi kai i itūgod izguojušais etnografiskuo ansambļa “Vabaļis” albums “Lobais reits” ari “Dzīsmis ap Dīva Pīdzimšonu” breineigi paruoda Latgolai rakstureigū dzīduošonys i kulturys tradiceju, ka tradicionaluo dzīduošona (folklorys izpratnē) i gareiguos dzīsmis, katuoļu dzīduojumi ir cīši saisteiti.

Vacūs Zīmyssvātku dzīšmu īdzuoduotuoji, folklorys kūpa “Saime” dybynuota 2007. goda rudinī i tuos repertuarā pamatā ir Zīmeļlatgolys apleicīnis godskuortu i sadzeivis gūdu dzīsmis, bet “Saime” dzīd i Dīva dzīsmis – saļmis, maja dzīduojumus pi krysta, Zīmyssvātku dzīsmis. Folklorys kūpa ir aktivs gon vīteja, gon leluoka mārūga folklorys nūtikšonu i festivalu dalinīks. Albumu “Saime” īrakstejuse 2014. goda oktobrī Vactiļžā Edgara Skrāģa (Meduza sound) vadeibā.

Zīmyssvātku dzīšmu izlase, albums “Dzīsmis ap Dīva Pīdzimšonu” nūpārkams bazneicu gruomotu goldūs, bīdreibys “Latgolys Studentu centrs” gruomotu goldā, veikalā “O! Marta” Daugovpilī kai ari vaicojams bazneickungam Aigaram Bernānam privati, rokstūt aigars.bernans@inbox.lv.

Rokstu sagataveja: Edeite Husare

01-04_53O8oBE0hDPnUk5glQ5B21YGwn6wXm80

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]