Itūvosor Lūznovys muižā nūtiks Dobys koncertzals

Portals lakuga.lv 17. Februars, 2016. gods Comments Off on Itūvosor Lūznovys muižā nūtiks Dobys koncertzals

2016. godā unikalū breivdobys pasuokumu – Dobys koncertzalu – byus vareiba apmeklēt ari Latgolā – 18. junī tys nūtiks Lūznovys muižys parkā Rēzeknis nūvodā.

12088505_433304783524969_3401591078452919449_nDobys, muokslys i muzykys meiļuotuoji Dobys koncertzalu aicynuoti apmeklēt jau vīnpadsmytū godu, itūgod tys tics pi patrona – Vaļsts prezidenta Raimonda Vējuoņa. Suocūt darbeibys ūtrū desmitgadi, itūvosor Dobys koncertzals stuosteis par vīnu nu zeideituoju kuortys puorstuovim, par kū organizatori piečuok informēs atseviški.

Dobys koncertzals sovā pastuoviešonys laikā nu vokora muziciešonys nalelā cylvāku lūkā palics par vierīneigu breivdobys pasuokumu, kur Latvejis zynuotnīki i muokslinīki izzinis i rodūšajuos darbneicuos i emocionalūs muzykys, gaismys i video prīšknasumūs apmaklātuojim dūd vareibu īpazeit ci nu jauna atkluot i bīži sateikamys, i ratys i apdraudātys dobys vierteibys.

Kotru godu Dobys koncertzalu apmeklej 6000 – 9000 cylvāku. Projektā, pamatojūtīs iz vysaidu dobys zynuotņu zynuotnīku dūtū saturiskū informaceju, Dobys aizsardzeibys puorvaļdis darbinīki veiduojuši interaktivys izzinis i īdvasmys darbneicys. Sovukuort muziki – Andris Sējāns, Ingus Ulmanis, Kaspars Tobis, Aigars Voitiškis, Anrijs Grinbergs, Valdis i Rūta Muktupāveli i cyti – kotru godu radejuši jaunus muzykalūs skaņdorbus. Režisors Roberts Rubīns veiduojs pasuokuma video i gaismys interpretaceju.

Ituogods Dobys koncertzala bezmoksys pasuokumus organizēs bīdreiba “Dabas koncertzāle” sadarbeibā ar Dobys aizsardzeibys puorvaļdi, Latvejis Universitati, Rēzeknis i Jelgovys nūvoda pošvaļdeibu, Latvejis vidis aizsardzeibys fondu, pasuokumu vītu saiminīkim i breivpruoteigajim paleigim. Pasuokumus atbolsta ari Latvejis Vidis aizsardzeibys fonds.

Karteņa: Raimonds Kaļva (Lūznovys muižys facebook lopa)

Komentari slāgti.