Daugovpilī nūtiks tautys muzykys koncerts “Pavasari gaidot”

Daugovpilī nūtiks tautys muzykys koncerts “Pavasari gaidot”

4. martā 18.00 Daugovpilī, Vīneibys noma koncertzalā, nūtiks tautys muzykys koncerts “Pavasari gaidot”, kurymā divejis atraktivys muzykalys grupys – tautys muzykys ansamblis “Rakari” (Daugovpiļs) i jaunīšu postfolklorys grupa “Rikši” (Rēzekne) – īskandynuos pyrmuos pavasara vāsmis.

Obeju kolektivu koncertprogramys veiduotys stilistiski dažaiduos manīrēs – nu klasiski romantiskom tautys meļdeņu apdarem da breivi veiduotu kompoziceju, kurūs saknis snādzās latgalīšu i latvīšu tautys muzykys montuojumā.

Tautys muzykys ansamblis “Rakari” dybynuots 1986. godā. Ansambļa repertuarā ir vadeituoja Evalda Dauguļa veiduotys nūvoda tautysdzīšmu meļdeņu apdaris i aranžiejumi, kai ari originaldzīsmis. Ansambļa instrumenti ir akordeons, flauta, oboja, klarnete, trompete, saksofons, vejūlis, sytaminstrumenti, kontrabass. Vīns nu golvonūs instrumentu – cylvāka bolss. Ansamblis “Rakari” pīsadalejs vairuokūs tautys muzykys svātkūs Latvejā i storptautyskūs festivalūs Francejā, Holandē, Grekejā, Vuocejā, Čehejā i cytur. Kolektivs koncertej Daugovpiļs piļsātys i Latvīšu kulturys centra reikuotajūs pasuokumūs, ari tautys muzykys festivals “Lustes Jēkabpilī” ir palics par meiļu kolektiva uzastuošonys vītu.

Postfolklorys grupa “Rikši” jau 5 godus kūpā spielej latgalīšu, latvīšu i cyttautu tradicionalū muzyku sovā redzejumā car vejūlis, akordeona, bubyna, perkuseju, basgitarys, gitarys, mandolinys i pīcu spareigu jaunīšu bolsu skaņom. Suokumā grupa prīcynuoja folkkluba “Ala.Pagrabs” apmaklātuojus, tok dreiži viņ suoce koncertēt ari uorpus tuo. “Rikši” sovys pastuoviešonys laikā ir uzastuojuši Lītovā, Fraņcejā, Vuocejā, Gruzejā, Krīvejā, kai ari vysaidūs festivalūs i naskaitamūs koncertūs Latvejā. Laika gaitā grupys dalinīki ir na tik auguši muzykali, nu ari vaira apsazynuojuši i izprotuši sovu atbiļdeibu pret tradicionalū montuojumu. Sovys darbeibys laikā izdavuši divejus albumus – 2014. godā “Pa pyrmam” i 2016. godā “Sieju sovu”.

Īīšona koncertā bez moksys.

67c469cd0a885bacda122b90eaeaefc9

Nūtikšonu kalendars

Dec
13
Cat
19:00 Gruomotys “Latgales pēdējie mohi... @ Reigā, Veru īlā 6
Gruomotys “Latgales pēdējie mohi... @ Reigā, Veru īlā 6
Dec 13 @ 19:00
Gruomotys "Latgales pēdējie mohikāņi" attaiseišona @  Reigā, Veru īlā 6 | Rīga | Latvija
Gruomota topuse vairuoku ekspediceju rezultatā, kuruos folkloriste i Zīdūņamuzeja pietneica Rūta Šmite kūpā ar antropologi i fotografi Elīnu Kursīti vuokušys cylvāku stuostus i īmyužynuojušys Latgolys mozcīmu īdzeivuotuojus fotografejuos. Gruomotu veidoj 52 stuosti, kurus papyldynoj vizuali boguoteigys[...]