19. martā 15.00 Reigā, Sv. Pītera bazneicā, tiks atkluota Jezupa Pīguožņa bolvys Latvejis ainovu gleznīceibā izstuode.

Izstuode byus apsaverama da 1. maja.

Piec izstuodis Reigā muokslinīku dorbi byus apsaverami Preiļūs. Izstuodis nūslāguma pasuokumā 17. septembrī Preiļūs konkursa golvonuos bolvys sajiemiejs tiks pi zalta medalis i naudys bolvys 3000 eiro apmārā, kū nūdrūsynoj Preiļu nūvoda dūme. Obeju izstuožu laikā nūtiks skateituoju bolsuojums. Skateituoju simpateju bolvu itūgod nūdrūsynuos Reigys pošvaļdeibys kulturys īstuožu apvīneiba i Preiļu nūvoda dūme.

Jezupa Pīguožņa bolva Latvejis ainovu gleznīceibā tyka īdybynuota 2015. godā, kab gleznīceibā turpynuotu atteisteit i popularizēt Latvejis ainovu, kai ari vīnuotu Latvejis golvyspiļsātys i nūvodu kulturys procesus. 2015. godā golvonū bolvu sajēme gleznuotuojs, Latvejis Muokslys akademejis profesors Roberts Muzis, sovukuort skateituoju simpateju bolvu dabuoja jaunuo muokslineica Kristīne Kvitka.