Daugovpilī reikuos XI storptautyskū folklorys festivalu

LaKuGa 4. Apreļs, 2016. gods Comments Off on Daugovpilī reikuos XI storptautyskū folklorys festivalu

Daugovpils folklorys festivalsĪskandynojūt Jura dīnu, nu 22. da 24. apreļa nūtiks XI Daugovpiļs Storptautyskais folklorys festivals, informej Daugovpiļs piļsātys puorstuovi. Festivals puļcēs na tik vītejuos Latvejis folklorys kūpys i interesentus, nu ari daudzys uorvaļstu grupys, kuruos varēs dzierdēt festivala atkluošonys koncertā, lelkoncertā i grupu individualajūs koncertūs.

Vjačeslavs Lukjanovs i Valentins Krulikovskis (Viļņa/Lītova) senejuo tautys muzykys instrumenta vargana spēlis meistarklasē izstuosteis instrumenta rasšonuos viesturi, tuo spēlis ītekmi iz cylvāku, tuo izmontuošonu myusu dīnu muzykā, kai ari īvuiceis ituo instrumenta spēlis pamatpryncypus. Festivala dalinīkus i sevkuru interesentu gaida ari tradicionaluos dzīduošonys meistarklase kūpā ar Zani Šmiti (Reiga/Latveja). Jura dīnys svineibys kuplynuos Inga Karpiča (Reiga/Latveja) ar tautysdzīšmu sasadzīduošonys meditaceju “Dziedināšanās caur tautasdziesmu”. Festivala eipašī gosti ar speciali sagataveitu programu, kas bolstuos iz boltkrīvu i cytu Eiropys tautys muzykys materialu, byus grupa “Stary Olsa” nu sābru vaļsts Boltkrīvejis golvyspiļsātys Minskys.

Festivala ītvorūs nūtiks eipašs rituals – Ūseņa zeimis izgataveišona kūpā ar Daugovpiļs keramiki Ligitu Pakni i pantāga garšuošona nu kūpejuo festivala kotla, par kū pasaryupēs Aglyunys Maizis muzeja saimineica Vija Kudiņa.

Piec koncertu, meistarklašu i cytu izdareibu vālā vokorā vysus gaida sasadoncuošona.

Festivala reikuotuoji sovu pasuokumu raksturoj itai: “Festivalā, Ūseņa aizsorguoti, atslēgsim vuortus vosorai. Ūseņš itamuos dīnuos mums paleidzēs ar dzīsmem i dejom savīnuot paguotni, tagadni i nuokūtni, tradiceju i kasdīnu, guoduos par zyrgim i bitem,  ness veiksmi na tik ceļā iz festivalu i sātu, nu ari vysā festivala nūrisē.”

Festivala programma

Komentari slāgti.