Izsludynuots fotokonkurss “Durvis uz Latgales koka mantojuma pasauli”

Izsludynuots fotokonkurss “Durvis uz Latgales koka mantojuma pasauli”

Rēzeknis Zaļuos sinagogys kūka arhitekturys montuojuma centrys izsludynoj konkursu “Durvis uz Latgales koka mantojuma pasauli”, informej Rēzeknis piļsātys sātys lopa. Konkursa golvonais mierkis ir Latgolys kūka arhitekturys montuojuma populariziešona, kai ari sabīdreibys i atbiļdeigūs organizaceju viereibys dasaisteišona Latgolys kūka arhitekturys paraugu saglobuošonys problemom. Konkursā pīsadaleit aicynuoti i profesionali fotografi, i amatīri.

Konkursā teik pījimtys fotografejis (elektroniski, ar lobu izškiertspieju), kurymuos var byut attāluoti Latgolys kūka arhitekturys pīminekli, kūka sātys i saimisteibys byuvis, sātu kūka apdaris elementi (apmalis, durovys i cyti), tys ir – vyss, kas var atbiļst konkursa temai. Pavodviestulē juonūruoda fotografa vuords, pavuorde i kontaktinformaceja, kai ari adress, kur tyka uzjimtys fotografejis (var byut aptuvana, par pīmāru, pogosta nūsaukums). Dorbus var īsnīgt da 11. maja. Uzvarātuoji tiks paziņuoti i apbolvuoti 21. majā Rēzeknis Zaļajā sinagogā, kur varēs ari apsavērt uzvarātuoju dorbus. Vysys fotografejis byus izlyktys socialajā teiklā Facebook Zaļuos sinagogys lopā. Vysvaira bolsu (“Like”) sajāmušuos kartenis autors sajims skateituoju simpateju bolvu.

Konkursa nūlykums

Kai viestej Rēzeknis piļsātys dūmis Uorejūs sakaru nūdalis vadeituoja Nataļja Jupatova, itūšaļt nūteik aktivs dorbs pi Rēzeknis Zaļuos sinagogys kūka arhitekturys montuojuma centra nūlykuma izstruodis i apstyprynuošonys, i Latgolys kūka arhitekturys montuojumam veļteitais fotokonkurss ir pyrmais centra pasuokums. “Kūpeigim spākim, cīši sasadorbojūt ar norvegu partnerim, mums ir izadevs atgrīzt dzeiveibu senejuos sinagogys kūka kuormam, kas breinumainā kuortā ir sasaglobuojuse nu 19. godu symta vyda. Studenti, pasnīdzieji i byuvnīki sajēme nanūviertejamu kūka kuormu restauracejis pīredzi i gryb pasadaleit sovā pīredzē ar cytim. Kūka arhitekturys paraugu restauracejis pīredzis nūdūšona ir vīns nu golvonajim centra aizdavumim, nu leidza ar tū mes planavojam popularizēt Latgolys kūka montuojumu i pošu Latgolys dzeivuotuoju vydā, i Reigā, i uorzemēs. Mums ir, ar kū lapuotīs, i mums juospiej tū paruodeit i saglobuot,” saceja Nataļja Jupatova.

Fotokonkurss nūsaslēgs Muzeju naktī, kas itūgod nūtiks 21. majā i Rēzeknis Zaļuos sinagogys kūka arhitekturys montuojuma centrys itymā pasuokumā pīsadaleis pyrmū reizi. Itamā naktī riezeknīši i piļsātys gosti varēs apmeklēt unikalū Rēzeknis sinagogys kuormu i apsavērt restauratoru i byuvnīku ryupeiguo dorba rezultatus, kai ari īsapazeit ar piļsātys ebreju kūpīnys viesturei veļteitū ekspoziceju.