18. majā 15.00 Preiļu Viesturis i lītiškuos muokslys muzeja ekspoziceju zalā Raiņa bulvarī 28, 1. stuovā, nūtiks izstuodis “Borhu dzimtas atspulgi” atkluošona, informej muzeja specialists Vadims Maksimovs.

Preiļu viesture apmāram 500 godu beja saisteita ar senejū muižnīku Borhu dzymtu, kuruos atstuotais kulturys montuojums parkā interesej i piļsātys dzeivuotuojus, i gostus. Da šam Preiļu Viesturis i lītiškuos muokslys muzeja apmaklātuojim nav bejs vareibys redzēt, kai izavēre slovonī muižys eipašnīki, i izzynuot vaira par jūs saimis dzeivi i liktinim varēja viņ fragmentarūs aprokstūs. Ari par tū, kaids ir bejs muižnīku raksturs, varēja sprīst tik nu dažu muižys kolpu radeitu legendu.

Diveji laikmati – četrys Borhu paaudzis, kuruos atspīgeļuotys Latvejā pyrmū reizi eksponātuos ituos dzymtys puorstuovu portretu reprodukcejuos i fotografejuos, izstuodis apmaklātuojam atkluos 18. – 19. gs. mejis muokslys pasauļa redzīni, Latgolys pūļu muižnīku kulturys vierteibys, kai ari jaunus faktus par Preiļu muižys eipašnīku dzeivi. Izstuodē varēs apsavērt ari unikalū Maltys Ordiņa komandora tārpa fragmentu, kurs pīderejs grafam Jozefam Henriham Borham.

Izstuode veiduota, sasadorbojūt ar vairuokim Pūlejis viesturis i muokslys muzejim, Lītovys nacionalū biblioteku, Latvejis Vaļsts viesturis arhivu, Ukrainys Nacionalū Zynuotniskū biblioteku Ļvovā i Borhu dzymtys pietnīku Igoru Kolosovu.

Pasuokuma laikā apmaklātuojim tiks prezentāta ari jaunuo Preiļu parka turisma audiogida mobiluo aplikaceja, kas ir sagataveita angļu volūdā i byus daīmama vysim Preiļu piļsātys gostim, kas gribēs izbaudeit nasteidzeigu pastaigu piļsātys parkā i izzynuot vaira par tuo viesturi i nūslāpumim.