Velo ekspediceja Kuorsovys nūvodā

LaKuGa 10. Majs, 2016. gods Comments Off on Velo ekspediceja Kuorsovys nūvodā

Suocūt aktivū velo sezonu, 14. majā 10.00 vysi ritiņbraukšonys cīneituoji teik aicynuoti dūtīs velo ekspedicejā “Rypoj dobā!” pa Kuorsovys nūvoda teritoreju i dobys parku “Numernes valnis”, informej Kuorsovys nūvoda turisma organizatore Inga Bernāne. Pasuokumu organizej Kuorsovys nūvoda pošvaļdeiba sadarbeibā ar Dobys aizsardzeibys puorvaļdi.

Sasapuļciešona velo ekspedicejai nūtiks Kuorsovys piļsātys skverā 10.00, i ūtra sasatikšonys vīta ir Saļņovys muižys parks 10.40. Tuoļuok kūpejā braucīnī ar Dobys aizsardzeibys puorvaļdis vacuokū vaļsts vidis inspektori Elīnu Tripāni nūtiks dūšonuos iz dobys parku “Numernes valnis”, kur tiks sajimts īskots par vaļsts nūzeimis aizsorguojamū dobys teritoreju. Kūpejais maršruta garums ir apmāram 35 km (karte), i planavuotais atsagrīsšonys laiks Kuorsovā – 16.00.

Dalinīkim ir juobyut sovim velosipedim, i bārni da 13 godu vacuma braucīnī var pīsadaleit tik vacuoku pavadeibā. Leidza var jimt ari uzkūdys nalelam piknikam pi Nūmērnis skotu tūrņa.

Velo ekspedicejis mierkis ir īpazeit Kuorsovys nūvoda gleznainuos vītys, izzynuot dobys vierteibys i dobys parku “Numernes valnis” pavasara plaukumā. Tei ir breineiga vareiba i saimem ar bārnim, i aktivim cylvākim pavadeit breivdīnu svaigā gaisā i sasasmeļt jaunys zynuošonys par procesim dobā, floru i faunu, kas atrūnama mežā i dobys parka “Numernes valnis” nūzeimi dobys vierteibu saglobuošonā.

Dobys parks “Numernes valnis” ir vīna nu nadaudzuom vītom vaļstī, kur sastūp sausīņu prīžu mežus, kas izaveiduojuši iz osim voi osveida vaļnim. Sastūpamys taidys ratys i aizsorguojamys sugys kai Ruiša pūkgaļve, smyltuoju esparsete i zuoļlopu smiļteneite. Vaļņa pakuojē izskoluošonuos rezultatā ir veiduojušuos nadaudz kaļkainys augsnis, kas ir pīmāruots biotops Latvejā aizsorguojamai i ari ES Biotopu direktivys augu sugai – dzaltonai dzagiužkūrpeitei. Nūmērnis vaļns ir vīna nu boguotuokajom meža sylpuriņu vītom Latvejā.

Dasasaceišona, zvonūt t. 29327265 voi rokstūt iz e-postu turisms@karsava.lv.

Velo_ekspedicija

Komentari slāgti.