GORS svieteis 3 godu jubileju

GORS svieteis 3 godu jubileju

Majs ir Latgolys viestnīceibys GORS atkluošonys mieness, partū 28. majā pyrmais jaunizcaltais regionalais koncertzals Latvejā aicynoj iz sovys trešuos dzimšonys dīnys koncertu “Lobs vokors GORĀ!”, informej Latgolys viestnīceibys GORS mārketinga nūdalis vadeituoja Edeite Husare.

Latgolys viestnīceibys GORS dzimšonys dīnys koncertā iz vīnys skotuvis kūpā byus vokaluo grupa “Latvian Voices”, bruoļu Raimonda i Oskara Petrausku i Riharda Zaļupis projekts “Xylem TRIO” i, prūtams, ari pošu sātys prīca – Rēzeknis kamerorkestris dirigenta Juoņa Stafecka vadeibā. Taišni ar Rēzeknis kamerorkestri 2013. goda 19. majā aizasuoce Latgolys viestnīceibys GORS darbeiba, orkestram kai pyrmajam īskandynojūt Leluo zala skotuvi. Koncerta programa byus dažaida, nu ar eipaši latgalisku kruosu, par kū pasaryupēs i “Latvian Voices”, i ari Rēzeknis kamerorkestris, pyrmatskaņojūt Riharda Zaļupis jaundorbu “Latgales ainavas”.

Par koncerta nūsaukuma izvieli i saturu GORA Muokslinīcyskuos i pasuokumu nūdalis vadeituoja Ilona Rupaine soka: “Koncertā i tuo nūsaukumā gribējem paruodeit tū, kaida kasdīnā ir Latgolys viestnīceiba GORS – pyrmais sveicīņs pi myusu vysod ir sirsneigi latgalisks, sevkuru gostu sagaidūt kai sovejū, tok itūs treis godu pastuoviešonys laiks bejs pylns jaunu izaicynuojumu, puorbaudeitu vierteibu, kai ari i pošu, i Latvejis i pasauļa leimiņa muokslinīku uzastuošonu. Tys vyss byus ari dzimšonys dīnys koncertā – sovejī i pasaulī atzeitī, zynomys vierteibys i pyrmatskaņuojums.”

Rēzeknē asūšais daudzfunkcionalais koncertzals 2013. godā pyrmais sekmeigi aizsuoce Latvejis regionalūs koncertzalu teikla eistynuošonu, kuram 2014. godā dasavīnuoja Vydzemis koncertzals “Cēsis“ i 2015. goda beiguos ari Līpuojis “Lielais dzintars“. Treis godu pastuoviešonys laikā Latgolys viestnīceiba GORS ir pīruodejuse, ka tei ir spieceigs magnets kulturys nūtikšonu baudeišonai, daudzfunkcionala i vareibom pylna āka pasuokumu reikuošonai i kvalitativs seminaru i konfereņču servisa pīduovuotuojs, kas dasaista i piļsātys i regiona, kai ari vysys vaļsts i uorvaļstu interesentus.

Latgolys viestnīceibys GORS dzimšonys dīnys koncerts “Lobs vokors GORĀ!” nūtiks 28. majā 18.00 GORA Lelajā zalā. Beleti Latgolys viestnīceibys GORS i “Biļešu Paradīze“ kasēs, škārsteiklā latgalesgors.lv. Beletu cenys nu 7 da 15 eiro.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]