10. majā Rēzeknis Tehnologeju akademejā (RTA) nūtyka RTA jauktuo kora “Sonitum” diska “Dīva pasauļs” prezentaceja, informej augstškolys sabīdryskūs attīceibu nūdaļa.

Ceļā iz Latvejis vaļsts 100. godadīnu RTA kors “Sonitum” ir sagatavejs sovys muzykys īrokstu. Kora rodūšais veikums, kas ir apkūpuots diska formatā, ir duovona Rēzeknis Tehnologeju akademejai i tuos partnerim.

Diska prezentacejis īvodā kora “Sonitum” dirigents Juoņs Mežinskis izsaceja pateiceibu rektoram Edmundam Teirumniekam par kora atbaļsteišonu, rektora vītnīkam sadarbeibys i atteisteibys vaicuojumūs Gunāram Strodam par diska īraksteišonys ideju i atbolstu tuo radeišonā, Mārim Justam, Sandrai Ūdrei, Ilgai Šuplinskai, Ainai Strodei, kai ari daudzim cytim, kurī atbaļsteja, kab skaistuo ideja puortoptu diska formatā. J. Mežinskis, turpynojūt stuosteit par albumu, akcentēja, ka īroksts radeits tīpat – RTA aktu zalā, dasaistūt skaņu operatoru Ati Auzānu.

Turpynuojumā kora vokaluo pedagoge Guntra Kuzmina uzrunuoja J. Mežinski, izsokūt prīcu par vareibu sasadorbuot, kai ari sirsneigai pasasaceja par īguļdejumu kora “Sonitum” izaugsmē. G. Kuzmina izsaceja pateiceibu ari Atim Auzānam, ar kuruo paleidzeibu tyka īraksteitys dzīsmis.  Taipat G. Kuzmina atkluoja, ka, veidojūt apdaris latgalīšu tautysdzīsmem, jei gribēja savīnuot tautys tradicejis ar myusdīneigim motivim, kas našaubeigi ir izadevs.

Diska prezentacejis svātkūs kors “Sonitum” prīcynuoja skateituojus ar treis dzīsmem nu albuma “Dīva pasauļs”: “Zīdi, zīdi rudzu vuorpa”, “Sirdsgunteņa” i “Dzīdi, dzīdi putineni”.

Diskā “Dīva pasauļs” atrūnamys latgalīšu tautysdzīsmis i originaldzīsmis kora vokaluos pedagogis G. Kuzminys i dirigenta J. Mežinska apdarē. Kors “Sonitum” ir dybynuots 1995. godā, tuo nūsaukums tulkuojumā nu latiņu volūdys nūzeimoj ‘skaņa’. “Sonitum” regulari uzastuoj RTA pasuokumūs, konfereņcēs, koru draudzeibys koncertūs, pīsadola vysūs Vyspuorejūs latvīšu Dzīšmu svātkūs i Studentu dzīšmu svātkūs “Gaudeamus”, ar panuokumim uzastuoj vysaidūs konkursūs i koru skatēs i Latvejā, i aiz tuos rūbežu.

Īspaidūs i emocejuos par diska īraksteišonys procesu pasadaleja RTA studeņtis, kora “Sonitum” dalineicys.

RTA bakalaura studeju programys “Interjera dizains” 3. kursa studeņte Kristiāna Manukina stuosta: “Vysys diskā īraksteituos dzīsmis maņ cīši pateik i ir sirdei tyvys, partū ka taišni latgalīšu dzīsmēs ir spāks. Dzīsmis apvīnoj! Īraksteit dzīsmis nav vīglai. Ir jau īraksteita puse nu dzīsmis, i te pieški tu dzierdi – kaidam zvona telefons! Vyss! – dzīsme otkon juosuoc nu suoku, partū ka nikas kūpā natyka montāts. Ir juonūdzīd kotra dzīsme nu suoku da beigu, bez apstuojis! Tys ir gryuts i nūvuordzynojūšs dorbs, nu dorba augli ir tuo vārti!”

RTA studeju programys “Sociālais rehabilitētājs” 1. kursa studeņte Ērika Kanča soka: “Īrokstūt disku, emocejis beja breineigys. Tei beja loba pīredze īraksteit dzīsmis jau profesionalā leiminī. Namaluošu, īraksteišonys process beja cīši laikītylpeigs i cīši nūvuordzynojūšs, vairuokys stuņdis piec kuortys. Maņ beja lela prīca i ari atbiļdeiba īdzīduot solo pūsmu dzīsmē “Gauži raud saulīte”. Vyslobuok paliks atmiņā pozitivuo komanda, ar kurū tyka īraksteits disks.”