Izsludynuots Juoņa Streiča jubilejam veļteits konkurss školānim i studentim

LaKuGa 19. Majs, 2016. gods Comments Off on Izsludynuots Juoņa Streiča jubilejam veļteits konkurss školānim i studentim
Izsludynuots Juoņa Streiča jubilejam veļteits konkurss školānim i studentim

Rībeņu vydsškola sadarbeibā ar Rībeņu nūvoda dūmi, Daugovpiļs Universitati, Rēzeknis Tehnologeju akademeju, Nacionalū kino centru, Reigys Kino muzeju i bīdreibu “Ekrāns” izsludynoj kinorežisora Juoņa Streiča 80 godu jubilejam veļteitu zeimiejumu, jaunradis i pietnīcyskūs dorbu konkursu “Jāņa Streiča kino pasaule – manai dvēselei un mūsu laikmetam”.

Konkursa mierkis ir atkluot J. Streiča kinu rūsynuotuos školānu, studentu i jaunīšu dūmys, izjiutys, puordzeivuojumus i zynuošonys jaunradis i pietnīcyskajūs dorbūs, rodūt unikalu duovynuojumu īvāruojamajam latvīšu režisoram 80 godu jubilejā.

Konkursā var pīsadaleit Latgolys 5.-12. klašu školāni, kai ari Latvejis augstškolu studenti da 25 godu vacuma. 5.-6. klašu školāni pīsadola ar zeimiejumim, 7.-12. klašu školāni ar eseju voi jaunradis dorbu, nu studenti – ar pietnīcyskū dorbu.

Dorbi var byut i latgaliski, i latvīšu literarajā volūdā, kai ari krīvu volūdā, ka dalinīkam tei ir dzymtuo. Zeimiejumi var byut sevkurā tehnikā. Studentim pietejumam juoizavielej vīna Juoņa Streiča kina, juoraksturoj tei (izmontuotūs muokslinīcyskūs leidzekļu, kino semiotikys voi leidzeigā veidā), kai ari juoīlīk tei Latvejis kulturys i sabīdryskuos dzeivis kūpsakareibuos voi ari juodasavierš režisora personeibys izviertejumam i īguļdejumam Latvejis kulturys procesūs. Pietnīcyskī dorbi juoroksta latvīšu volūdā.

Lobuokī dorbi tiks apkūpuoti jaunradis dorbu izdavumā, kas tiks izduovuots Juoņam Streičam 80 jubilejā.

Dorbi juoīsnādz da 10. septembra. Školānu grupys dorbi juoīsnādz, syutūt tūs iz e-postu rvs-konk@inbox.lv (Tema: “Streičam 80”) voi pa postu: Rībeņu vydsškola, Līpu īla 21, Rībeni, Rībeņu nūvods, LV-5326. Studentu dorbi juoīsnādz pa postu iz adresi: Humanitaruo fakultate (316. kab.), Vīneibys īla 13, Daugovpiļs, LV-5401. Nūruode: Konkursam “Streičam – 80”.

Konkursa nūslāgums i dalinīku apbolvuošona paradzāta oktobrī Rībeņūs.

Vaira informacejis par konkursu – nūlykumā

Komentari slāgti.