Malnovys muižys parkā nūtiks fonda “Viegli” koncerts

LaKuGa 26. Majs, 2016. gods Comments Off on Malnovys muižys parkā nūtiks fonda “Viegli” koncerts
Malnovys muižys parkā nūtiks fonda “Viegli” koncerts

Gleznainajā i stuostim apveitajā Malnovys muižys parkā 29. majā 19.00 nūtiks Imanta Zīdūņa fonda “Viegli” i draugu koncerts, informej Kuorsovys nūvoda turisma organizatore Inga Bernāne. Tys byus nūslāgums bīdreibys “Fonds “1836”” reikuotajam div dīnu puorguojīņam Latvejis pīrūbežā.

Aktivī i sportiskī Kuorsovys, Baļtinovys i Viļakys nūvoda dzeivuotuoji i gosti teik aicynuoti dasavīnuot puorguojīņam, kas sovu ceļu suoks 28. majā nu Rekovys da Baļtinovys i 29. majā turpynuosīs nu Baļtinovys da Malnovys muižys parka, kur 19.00 nūtiks nūslāguma koncerts. Iz breivdobys koncerta nūtikšonys vītu gosti teik aicynuoti jimt leidza piknika dečus i vysu vajadzeigū jaukam vokoram saimis voi draugu lūkā aiz Malnovys muižys kuorma asūšajā parkā. Leita gadīnī koncerts nūtiks Malnovys koledžys zalā.

Pasuokuma laikā Malnovys “Dzīļu” maizneicys saimineica apmaklātuojim pīduovuos īsaguoduot i baudeit nu vītejūs produktu taiseitus gordumus.

Bīdreiba “Fonds “1836” aizvadeitajā godā ir suokuse Latvejis symtgadei veļteita projekta “Aplido, apceļo, apmīļo Latviju!” realizaceju. Projekta mierkis ir sadarbeibā ar Latvejis pīrūbeža pošvaļdeibom, turisma informacejis centrim i vītejim dzeivuotuojim izveiduot turisma stygu apleik Latvejai, kab kotrys interesents varātu apceļuot i īpazeit Latveju vysuos tuos kulturviesturiskajuos boguoteibuos.

Kab sasnāgtu mierki i informātu ari vītejūs dzeivuotuojus par Latvejis īpazeišonys stygu, “Fonds “1836”” kotrā Latvejis pīrūbeža nūvodā reikoj 2 dīnu puorguojīni i nūslāgumā koncertu, kurymā uzastuoj Imanta Zīdūņa fonda “Viegli” muziki i jūs draugi.

Komentari slāgti.