4. junī Daugovpilī, Vīneibys nomā, Reigys īlā 22a, apmaklātuojim durovys attaiseis Latvejā leluokais Šmakovkys muzejs, kas pīduovuos myusdīneigu i atraktivu stuostu par šmakovku, informej Daugovpiļs turisma atteisteibys i informacejis agenturys vacuokuo eksperte turisma jūmā Lolita Kozlovska.

Pasasokūt Eiropys sābru attīceibu i partnereibys instrumenta Latvejis, Lītovys i Boltkrīvejis puorrūbežu sadarbeibys programys projekta “Museum Gateway” (Nr. LLB-2-208) i Daugovpiļs piļsātys dūmis finansialajam atbolstam, eistynuota Latgolys regiona atteisteibys agenturys sešus godus lūluotuo ideja par Šmakovkys muzeja izveiduošonu. Šmakovkys muzeja izveide ir lels izaicynuojums i vīna nu projekta aktivitatem, kuruos mierkis ir itū dzierīni padareit par pasaulī zynomu Latgolys kulinaruo montuojuma produktu.

Muzeja digitalizātajuos ekspozicejuos ar jaunuokūs tehnologeju paleidzeibu interaktivai varēs izzynuot šmakovkys taiseišonys procesu, kai ari apsavērt autentiskys i īspaideigys ražuošonys īkuortys. Kluotyn stuostam par dzierīņa taiseišonu sevkuram interesentam byus vareiba puorškūrsteit Latgolys viesturis puslopys, kab izprostu regiona viesturis svareiguokūs pūsmus. Muzeja ekspozicejom byus ari izgleitojūša lūma, informejūt par alkohola puormiereigys lītuošonys sakom. Muzeja apmaklātuojim byus daīmami bezmoksys audiogidi sešuos volūduos – latvīšu, latgalīšu, krīvu, angļu, vuocu i lītaunīku. Sovukuort zynūši gidi, kas laipnai sagaideis individualūs apmaklātuojus i grupys, snīgs izsmeļūšu stuostejumu i atbiļdēs iz vaicuojumim.

Muzeja dorba laiki: trešdīne – sastdīne: 11.00 – 19.00, svātdīne: 11.00 – 17.00, pyrmūdīne – ūtardīne: breivs. Grupys (nu 10 da 25 personu) ekspozicejis apsavieršonai gida pavadeibā aicynuotys dasasaceit vysmoz vīnu dīnu īprīkš, zvonūt Daugovpiļs turisma informacejis centram: +371 65422818, +371 26444810 voi rokstūt iz e-postu: info@smakovka.lv. Grupom nūteikti apmekliejuma laiki: trešdīnēs – sastdīnēs: 11.30, 13.30, 15.30 i 17.30, svātdīnēs: 11.30, 13.30 i 15.30.

Īīšonys belets Šmakovkys muzeja ekspozicejis apsavieršonai individualajim apmaklātuojim ir 3,50 eiro, školānim, kas sasnāguši 18 godu vacumu, studentim, pensionarim, personom ar invaliditati, personom ar tryuceigys voi moznūdrūsynuotys personys statusu – 2,50 eiro.

Īīšonys belets ekspozicejis apsavieršonai gida pavadeibā vīnai personai (pīaugušajam) – 3,15 eiro, školānim, kas sasnāguši 18 godu vacumu, studentim, pensionarim, personom ar invaliditati, saimem (personom) ar tryuceigys voi moznūdrūsynuotys saimis (personys) statusu i daudzbārnu saimem – 2,25 eiro.

Saimis īīšonys belets (nu 3 da 5 personu) – 2 eiro personai. Individuali gida pakolpuojumi Šmakovkys muzeja apsavieršonai (1h) – latvīšu i krīvu volūdā moksuos 6 eiro, nu angļu volūdā – 12 eiro.

Muzeja apmaklātuojim tiks pīduovuota ari šmakovkys degustaceja. Apmoksu par degustaceju varēs veikt tik skaidrā naudā muzejā pi Šmakovkys degustaceju gaļdeņa. Byus vareiba īsaguoduot vysaidus suvenirus ar muzeja simboliku.

Šmakovkys muzejs dorbuosīs Daugovpiļs piļsātys pošvaļdeibys turisma atteisteibys i informacejis agenturys paspuornē i atsateisteis par sovpateigu kulinaruo montuojuma centru, kas uzskotamā veidā atkluos i pīruodeis, ka latgalīšu tradicionalais dzierīņs šmakovka ir leidzvierteigs taidim pasaulī zynomim nacionalajim dzierīnim kai skotu viskijs voi slivovica, kū gatavej Centraleiropys vaļstīs.