Preiļu muzejs sajiems vierteigu duovynuojumu

LaKuGa 30. Majs, 2016. gods Comments Off on Preiļu muzejs sajiems vierteigu duovynuojumu

20160525_davinajumsPreiļu viesturis i lītiškuos muokslys muzejs duovynuojumā nu izcyluo muokslinīka Jezupa Pīguožņa dzeivisbīdris Leontinis Pīguoznis ir sajiems 20 prīškmatus – Latgolys keramiku Polikarpa Čerņavska i Andreja Paulāna dorbus, informej muzeja kruojuma globuotuoja Anda Mihailova.

Kotrai lītai ir sovs stuosts, kai tuos teik pi eipašnīku i kas nūteik piečuok. Leontine Pīguozne pastuosteja, ka Jezupam cīši patykuši A. Paulāna dorbi. Cīši bīži jis īsarads iz capļa kūršonu voi tiuleņ piec tam, kab īsaguoduotu izstruoduojumus (sviļpaunīkus, svečturus, vāzis). Muokslinīks parosti izavieliejs arhaiskys formys izstruoduojumus, partū izviele krytuse par lobu sviļpaunīkim “jū jautruok, jū lobuok”. Daži izstruoduojumi ir pabejuši ari izstuodē Juosmuižā, kurei beja veļteita Andrejam Paulānam. Sovukuort Polikarps Čerņavskis iz draudzeibys riekina ļuovs Jezupam kotrā sasatikšonys reizē izavielēt kaidu nu sovu dorbu. Tai Jezupa Pīguožņa kolekcejā tyka vysaida izmāra skryuzis i vāzis, vīnu vāzi izavieliejuse ari meita Īva.

Preiļu viesturis i lītiškuos muokslys muzejs ir pateiceigs Leontinei Pīguoznei par itim muzeja kruojuma jaunīgivumim, kurī papyldynuos jau muzejā asūšuos Jezupam Pīguoznim pīdarūšuos lītys.

Septembrī, kod Preiļūs byus apsaverama izstuode “Jāzepa Pīgožņa balva Latvijas ainavu glezniecībā” i tiks nūsaukti golvonuos bolvys nominanti, varēs īsapazeit ari ar keramikys izstruoduojumim, kurī daudzu godu garumā atsaroduši Jezupa Pīguožņa darbneicā kai moza daleņa nu dzymtuos Latgolys.

Komentari slāgti.