Preiļūs nūtiks pyrmais Latgolys stuostnīku festivals

LaKuGa 6. Juļs, 2016. gods Comments Off on Preiļūs nūtiks pyrmais Latgolys stuostnīku festivals

22. – 24. julī Preiļūs i apleicīnē nūtiks pyrmais Latgolys stuostnīku festivals. Tys puļcēs vītejūs stuostnīkus, stuostnīkus nu UNESCO Latvejis Nacionaluos komisejis teikla “Stāstu bibliotēkas” i cytu Latvejis stuostnīku grupu, kai ari vītejuos folklorys kūpys, stuostnīku kusteibys atbaļsteituojus i interesentus. Iz festivala pasuokumim aicynuots sevkurs i tī ir bez moksys.

Stuostus par omotnīku dzeivi, omotu nūslāpumim, kai ari vysaidim gadīnim omotnīku vydā stuosteis i poši omotnīki, i stuostnīki nu vysaidu Latvejis nūvodu, kab ar stuostim popularizātu omotu prasmis i sekmātu tūs puormontojameibu cytom paaudzem. Vīns nu festivala aizdavumu ir veiduot zynomu i rodūšu platformu Latgolys omotnīceibys izzynuošonai i populariziešonai, nu tikpat nūzeimeigi ir kūpt vysaidys latgaliskys izpausmis mutvuordūs, kab stuostūs izbaudeitu i styprynuotu latgaliskūs izlūkšņu daudzveideibu, lobskaneibu i izteiksmis precizitati. Ituo gods tema veļteita Latgolys tradicionalajai keramikai i pūdnīkim, kai ari stuostim par itū omotu i omota pratiejim.

Festivala pyrmajā dīnā 22. julī 20.00 interesenti aicynuoti iz “Anekdošu un jautro stāstu vakaru” jaunīšu centrā “PAKAC” (Kuorsovys īla 4, Preili).

23. julī, suocūt nu 15.00, Juosmuižys muižys parkā (Aizkaļne, Preiļu nūvods) byus vareiba satikt Latgolys keramikus i pasaklauseit jūs stuostejumu. 17.30 kūpā ar folklorys kūpu “Jumalāni” cepļa sātys pogolmā varēs īt rūtaļuos i doncuot daņčus, nu 20.00 nūtiks Lelais stuostu vokors “Lobam lobs stuosts”. Tymā pīsadaleis Upmolys folklorys ansamblis “Vecvārkava” i jūs stuostneica Bronislava Gavare, Kristians Plots nu Vuoŗkovys bārnu folklorys kūpys “Volyudzeite”, Andris Čakāns nu Ruguoju nūvoda, Trifina Ovčinnikova nu Audriņu, Anita Rutule nu Nagļu, folklorys kūpa “Vīteri” nu Rēzeknis, folklorys kūpa “Jumalāni” nu Rībeņu nūvoda, folklorys kūpa “Rūtoj” nu Preiļu, kai ari cyti Latgolys stuostnīki i stuostnīki nu cytu Latvejis nūvodu.

Sovukuort 24. julī 10 stuņdēs dzymdynuotuoji ar bārnim aicynuoti iz Preiļu Golvonū biblioteku (Kuorsovys īla 4, Preili), kur mozajim klauseituojim nūtiks pasuokums “Mazi stāsti no lieliem stāstniekiem”.

Stuostnīku festivali jau vairuokus godus Latvejā teik reikuoti, kab veicynuotu stuostnīceibys tradiceju kai nūzeimeigys namaterialuo kulturys montuojuma dalis saglobuošonu, eipaši pīsavieršūt kotra regiona (Kūrzeme, Zemgale, Vydzeme, Latgola) kulturtelpys unikalitatei. Apreļa beiguos itaids festivals aizvadeits Kuldeigā, niu nūtiks Preiļūs, nu Piļsrundalē planavuots 23. – 25. septembrī i Valmīrā 7. – 9. oktobrī.

stuostniki

Komentari slāgti.