Junī nūsaslēdze Bolvu Centraluos bibliotekys realizātais projekts “Video materiāla pievienošana Balvu reģiona Kultūrvēstures datu bāzes ierakstiem”, kurū atbaļsteja Vaļsts kulturkapitala fonds, informej projekta vadeituoja Ināra Bobrova.

Kulturviesturis datu bazi pamatā veidoj tekstualuo informaceja i kartenis, nu laika gaitā sasagribieja tū papyldynuot ari ar apsaveramu i dzierdamu informaceju. Jau 2015. goda rudinī pi īrokstu par etnografiskajim ansamblim, kurī pīsadaleja folklorys festivalā “Baltica 2015”, tyka dalykti video īroksti ar jūs izastuošonu pasuokumā “Mantinieki. Ziemeļlatgale”, īvārojūt, ka itim īrokstim daauga skatejumu skaits.

Tai kai bibliotekys direktoris Rutys Cybulis reiceibā beja lels daudzums viesturisku video materialu nu Bolvu rajona padūmis Kulturys nūdalis realizātajim projektim namaterialuo kulturys montuojuma saglobuošonai i filmātais materials nu personeigajim i cytim arhivim (filmātais materials apjam laiku nu 1998. goda da 2009. goda), tod roduos ideja par video fragmentu sagataveišonu. Projekta laikā tyka atlaseiti, sagataveiti i Kulturviesturis datu bazis īrokstim dalykti 34 video fragmenti ar tautys muzykantu voi teicieju izastuošonu.

Ar video papyldynuots 21 datu bazis īroksts: Natālija Smuška, Valentīna Babāne, Silvija Babāne, Kuprovys etnografiskuo ansambļa teicieja Leontina Bordāne, Irēna Laupace, Antonija Pabērza, Stefānija Keiša, Rozālija Slišāne, Emīlija Pužule, Margarita Šakina, Jāzeps Boldāns, Anna Dubkeviča, Helēna Medne, Baļtinovys etnografiskais ansamblis, Emīlija Logina, Stefānija Matisāne, Rekovys etnografiskais ansamblis, Upītes etnografiskais ansamblis, Vilhelms Supe, Marija Supe, Tiļžys folklorys kūpa.

Video: Rekovys etnografiskais ansamblis Bolvu rajona pasuokumā Žeigurūs 1990. godā (centrā teiciejis Margarita Šakina i Anna Ščemelinska) – nu A.Kapusta personeiguo arhiva