Izsludynuots fotokonkurss “Daugavpils tūrisma objekts”

LaKuGa 11. Juļs, 2016. gods Comments Off on Izsludynuots fotokonkurss “Daugavpils tūrisma objekts”
Izsludynuots fotokonkurss “Daugavpils tūrisma objekts”

Daugovpiļs piļsātys pošvaļdeibys turisma atteisteibys i informacejis agentura nu da 30. septembra reikoj fotokonkursu “Daugavpils tūrisma objekts”, kuruo mierkis ir veikt muokslinīciski kvalitativu Daugovpiļs turisma objektu karteņu atlasi, tūs tuoluokai izmontuošonai piļsātys turisma marketinga materialūs, turisma sātys lopā visitdaugavpils.lv i publikacejom masu sazinis leidzekļūs, informej agenturys vacuokuo eksperte turisma jūmā Lolita Kozlovska.

Konkursa reikuotuoji nu dalinīku gaideis kartenis, kas atspīgeļuos Daugovpiļs cītūksni, Daugovpiļs Marka Rotko muokslys centru, Latgolys zooduorzu, Dubrovina parku, Daugovpiļs nūvodpietnīceibys i muokslys muzeju, Saulis stuņdinīku, Andreja Pumpura skveru, Bazneicu kolnu, vysaidu religiskūs konfeseju dīvnomus piļsātys centrā i mikrorajonūs, Vīneibys nomu, Daugovpiļs teatri, Reigys īlu, Centralū parku, Daugovpiļs skrošu ryupneicu, Daugovpiļs kulturvidi (arhitekturu, piļsātys viesturiskū centru, pasuokumus), Daugovu, Strūpu azaru, aktivū atpyutu Daugovpilī i sporta pasuokumus.

Konkursā var pīsadaleit sevkurs foto entuziasts, fotoamatīrs voi profesionaļs naatkareigi nu vacuma i dzeivisvītys, īsyutūt na vaira par 10 digitalom karteņom JPEG, TIFF voi RAW formātā. Karteņu īsnīdziejam ir juobyut vīneigajam īsnīgtuo attāla autoram voi eipašnīkam. Natiks pījimtys ar grafiskuo dizaina programom modificātys kartenis, tok ir pīļaunama karteņu apstruode – gaišums i kontrasti. Nav pīļaunamys ari kolažys, mozaikys i kombinātī kadri. Kartenis nadreikst byut uzjimtys agruok par 2016. goda 1. janvari.

Konkursa uzvarātuoji tiks nūsaceiti ar konkursa Viertiešonys komisejis lāmumu, i konkursa rezultati tiks paziņuoti da 14. oktobra. Īsyuteitī dorbi tiks viertāti piec sekojūšu kritereju: atbiļsteiba konkursa temai; tehniskuo izpiļdejuma kvalitate; attāla muokslinīciskuo vierteiba; originalitate i kompozicejis izviele, sižets. Konkursa nūslāgumā pyrmūs treis vītu sajiemieji tiks apbolvuoti. Konkursa 1. vītys laureats sajims bolvu 50 eiro, 2. vītys – 30 eiro, nu 3. vītys – 20 eiro vierteibā.

Konkursa dorbi kūpā ar dasacejuma anketu juosyuta iz  e-postu: turisms@daugavpils.lv, ar nūruodi – Foto konkursam.

Konkursa nūlykums

Komentari slāgti.