Izdūts jauns albums ar Ludzys i Kuorsovys dzīsmem

LaKuGa 20. Juļs, 2016. gods Comments Off on Izdūts jauns albums ar Ludzys i Kuorsovys dzīsmem

13667727_1331349213559031_4854764794157769812_oTradicionaluos dzīduošonys grupa “Saucējas” ar prīcu viestej, ka izdavuse jaunu tradicionaluos muzykys albumu “Trīci, munu ustabeni”, kurymā īraksteitys 29 Ludzys i Kuorsovys dzīsmis.  

Latvejis Kulturys akademejis tradicionaluos dzīduošonys grupa “Saucējas” izaveiduojuse 2003. godā Reigā. Grupys dalineicys apvīnoj kūpeigs mierkis – vuiceitīs i popularizēt latvīšu tradicionaluos dzīduošonys stilus i tehnikys, eipašu viereibu veļtejūt tuom lokalajom tradicejom, kuruom rakstureiga daudzbolseiba. “Saucēju” repertuarā ir puorstuovāti vysaidi latvīšu tradicionaluos polifonejis veidi, kas dokumentāti puorsvorā treis Latvejis nūvodūs – Kūrzemē (R), Sielejā (DA) i Latgolā (A) i dūd prīškstotu i par arhaiskuos burdondaudzbolseibys veidim, i vysaidom vielīnuos izceļsmis daudzbolseibys formom. Cyta prioritate grupys repertuara izalaseišonā rūnās nu vareibom izmontuot arhivūs uzkruotūs tradicionalūs dzīduojumu skaņu īrokstus voi tīšus kontaktus ar dzīduotuojim – tradicejis nesiejim lauka pietejumu laikā. Sovys darbeibys laikā “Saucējas” sagatavejušys vairuokys koncertprogramys, kas veļteitys atseviškom Latvejis vokaluos muzykys tradicejom. Grupa da šam izdavuse treis muzykys albumus (“Saucējas” 2007, “Dziediet, meitas, vokorā. Sēlpils un Vārnavas folklora” 2012 (sajiems Latvejis muzykys īrokstu goda bolvu kai 2012. goda lobuokais tautys muzykys albums), “Saucējas. Enconcert á Paris” 2014), kurim nu dasavīnuojs ari catūrtais – “Trīci, munu ustabeni”.

Jaunajā albumā īkļautuo repertuara pamatā ir Latvejis PSR Zynuotņu akademejis folkloristu XII zynuotniskajā ekspedicejā, kurei nūtyka 1958. godā Ludzys i Kuorsovys rajonūs, savuoktī materiali. 2014. godā ari pošys “Saucējas” reikuoja lauka pietejumu, kurymā apmeklēja vītys Ludzys i Kuorsovys apleicīnē, kurymuos nūtyka folklorys vuokšona 1958. godā, kab dabuotu papyldu zinis par tūreizejim folklorys teiciejim, fiksātuo folklorys materiala tradicionalajim kontekstim, ekspedicejis nūtikšonys apstuoklim i tml., kai ari īsapazeitu ar tradicionaluos muzykys tuos šaļts situaceju Ludzā i Kuorsovā. Nu dorbs ir nūsasliedzs i rezultats atrūnams albumā “Trīci, munu ustabeni”, kurymā kruošņa vokaluo daudzbolseiba mejās ar melodiski daudzveideigim i niansātim solo dzīduojumim, kū papyldynoj ari daži instrumentaluos muzykys paraugi.

1958. goda ekspediceja dzīduotuojis īdvasmuojuse vaicuot i pieteit ari tuo laika kartenis i izveiduot albumam eipašu fotoseseju, kurymā “Saucējas” īmyužynuotys speciali dalaseituos 50.–60. godu suknēs.

saucejas

Albumu izdevs Kulturys menedžmenta centrys “Lauska”, tuo izdūšonu atbaļstejs Vaļsts kulturkapitala fonds. Septembrī grupa īcerējuse reikuot albuma attaiseišonys koncertus i Reigā, i Latgolā.

Foto: Aivis Šmulders i Jeremy Smedes

Komentari slāgti.