Atkluos Rēzeknei veļteitu Osvalda Zvejsalnieka izstuodi

LaKuGa 25. Juļs, 2016. gods Comments Off on Atkluos Rēzeknei veļteitu Osvalda Zvejsalnieka izstuodi
Atkluos Rēzeknei veļteitu Osvalda Zvejsalnieka izstuodi

Latgolys Kulturviesturis muzejā (Atbreivuošonys alejā 102, Rēzeknē) Rēzeknis svātku i vosorys festivalu nūskaņa īīt ar gleznuotuoja LMA profesora i Rēzeknis Gūda pylsūņa Osvalda Zvejsalnieka dorbu izstuodi “Veltījums pilsētai”. Izstuodis atkluošona 27. julī 15.00, tei byus apsaverama da 3. septembra, informej muzeja muokslys nūdalis vadeituoja Inese Dundure.

Katedralis tūrņu smailis ir puorlīcynūša Rēzeknis panoramys dominaņte, kab nu kuruos pusis mes pasavārtu iz piļsātu. Pavasara viejūs, zīmys mīrā voi ar zylu muokuleiti, ituos ceļtnis majestatiskums vys vēļ ir nagaistūša vierteiba Osvalda Zvejsalnieka Rēzeknis ainovuos. Tikpat nūzeimeiga ir vacuos piļsātys īleņu burveiba ar zīdūšim duorzim, dieļu sātmalim i klusim pogolmim. Laikam eimūt, mainuos muokslinīka ūtys trīpīņa roksts i kruosu palete, tok namaineiga ir mīlesteiba i cīns iz sovu piļsātu – Rēzekni.

Osvalds Zvejsalnieks dzims 1944. goda 21. martā Varakļuonūs, 1971. godā beidzs Latvejis Muokslys akademeju, nu 1976. goda ir Latvejis Muokslinīku savīneibys bīdrys. Nu 1970. goda struodoj Rēzeknis lītiškuos muokslys vydsškolā, vāluok ir Rēzeknis muokslys koledžys direktors i Muokslys akademejis Rēzeknis filialis vadeituojs. Itūšaļt – Rēzeknis Muokslys i dizaina vydsškolys direktors, Latvejis Muokslys akademejis Latgolys filialis profesors.

Nu 1971. goda pīsadalejs vaira par 60 nūvoda, vaļsts i storptautyskajuos muokslys izstuodēs, sareikuojs ap 20 personālizstuožu, regulari pīsadola storptautyskajūs plenerūs i grupu izstuodēs i Latvejā, i uorvaļstīs.

Karteņā: Osvalds Zvejsalnieks plenerā “Domas lidojums” Rēzeknē 2016. goda majā (Rēzeknis Kulturys i turisma centra foto). 

Komentari slāgti.