Juosmuižā nūtiks Latgolys tradicionaluos kulturys i omotu svātki

LaKuGa 2. Augusts, 2016. gods Comments Off on Juosmuižā nūtiks Latgolys tradicionaluos kulturys i omotu svātki

12. i 13. augustā Raiņa muzejā “Juosmuiža” (Aizkaļne, Preiļu nūvods) nūtiks Latgolys tradicionaluos kulturys i omotu svātki, informej muzeja puorstuovis.

12. augustā vysi teik aicynuoti pīsadaleit eista Latgolys keramikys molkys cepļa kurynuošonys pasuokumā. Nu reita keramiki nu TLMS “Rēzeknes apriņķa podnieki” rekonstruātajā Andreja Paulāna darbneicā glazēs i īliks ceplī sovus apdadzynuošonai sagataveitūs muola traukus. Ap pušdīņlaiku meistari cepli īkūrs i trauku apdadzynuošona turpynuosīs da 2 naktī.

13. augustā 11 stuņdēs ceplis tiks attaiseits, i sevkurs interesents varēs redzēt vēļ korstūs muola trauku izjimšonu, nūsavērt i īsaguoduot kaidu īsapatykušu prīškmatu. Pasuokumu vadeis keramiks Andris Ušpelis, uzastuos folklorys kūpa “Turki”.

Piec cepļa attaiseišonys ap 12.00 nūtiks sātys sīra siejieju konkurss. Par gorduokū sīru varēs bolsuot vysi pasuokuma dalinīki.

Nu 12.00 Juosmuižā dorbuosīs omotnīki (klugu pinieji, kaļvs, skaliņu pinieji, kūkomotnīki, lynu auklu i petērņu piniejs). Apmaklātuojim byus vareiba na tik vērtīs, nu ari pošim izgataveit sovu suveniru. Dorbuosīs omotnīku i sātys ražuotuoju tierdzeņš.

Nu 12.00 da 16.00 byus daeimama mobiluo pierts “Gariņš”, kur sevkurs interesents varēs baudeit relaksejūšu pierts goru Jašys upis krostā.

13.30 Juosmuižys breivdobys estradē nūtiks Aizkaļnis teatra kūpys “Gaisma” komedeja “Untažmolys burvesteibys” (autore i režisore Rasma Zariņa). Izvadumā pīsadaleis folklorys kūpys “Turki”, “Naktineica”, “Sovvaļnīki”, Aizkaļnis sīvīšu vokalais ansamblis, dzīsminīki Vinsents i Rihards Kūkuoji, Stabuļnīku KN videjuos paaudzis deju kolektivs, Rībeņu KC deju kolektivs “Strūga”. Izruode “Untažmolys burvesteibys” stuosta par tū, kai cīmā īsarūn vuorduotuoja mozdāls Odums i ļauds dūmoj, ka ari jis muok uorstēt i pībūrt. Cylvāki īt pi čaraunīka ar sovom vajadzeibom. Rūnās vysaidi puorprotumi i jautrys situacejis.

Piec izruodis nūtiks konkursa “Gorduokais sātys sīrs” uzvarātuoju i dalinīku apbolvuošona.

Pasuokuma laikā dorbuosīs SIA “Sātys” breivdobys kopejneica.

Īīšona: 2 eiro, bārnim da 12 godu – bez moksys.

Pasuokumu atbolsta VKKF Latgolys kulturys programa 2016.

Da 11. augusta pasuokumā pīsadaleit teik aicynuoti omotnīki, sātys ražuotuoji i sātys sīra siejieji.

jasmuiza 2016

Komentari slāgti.