Ituos sezonys nūslādzūšais pozitivūs stuostu cykla “Cytaidi latviskais” raidejums tiks suokts Rēzeknē, kur latgalīšu dzejnīks Valentins Lukaševičs byus nūstuojs pi Latgolys patriota, dzejnīka, sabīdriska darbinīka Ontona Kūkuoja pīminekļa, kur cylvāki mādz pasakavēt, padūmuot, atguoduot, īsadvasmuot. Nu Rēzeknis jis brauks iz Bumbiškim pi Ontona Kūkuoja dāla Vinsenta, kurs ari ir eists Latgolys patriots, sovu mīlesteibu pret dzymtū vītu jis izsoka sovuos dzīsmēs. Grupa “Trikmiņš” ir zynoma i nūvodā, i aiz tuo rūbežu, īcīneita vysaidūs pasuokumūs. Vinsents jem gitaru i lobpruot muzicej ari vīns voi kūpā ar saimi. Nazkod, tāva vierzeits, vuicejīs par pūdnīku, nu palics par cīši īcīneitu cepļu meistaru. Raidejums byus kluotyn, kod meistars myurēs kuortejū cepli i īkūrs guni jau pabeigtā dorbā pi keramika Andra Ušpeļa.