Jauns TV raidejumu cyklys “Sajūti Latgali”

LaKuGa 30. Augusts, 2016. gods Comments Off on Jauns TV raidejumu cyklys “Sajūti Latgali”
Jauns TV raidejumu cyklys “Sajūti Latgali”

Suocūt nu 30. augusta da ituo gods decembra vyda skateituojim tiks pīduovuots jauns raidejumu cyklys “Sajūti LATGALI” televizejis kanalā Re:Tv ūtardīnēs 22.00 ar atkuortuojumim trešdīnēs 15.30 i sastdīnēs 17.30 i televizejis kanals LTV1, suocūt nu 5. septembra kotru pyrmūdīni 22.45 ar atkuortuojumim LTV7 programā trešdīnēs 12.00 i sastdīnēs 7.00.

Raidejumūs byus vareiba īpazeit Latgolu i sajust tuos burveibu. Tiks lauzti stereotipi par Latgolu kai mozatteisteitu regionu i paruodeiti stuosti par uzjiemeigim i interesantim cylvākim.

Raidejums ir radeits NEPLP sabīdryskuo pasyutejuma ītvorūs. Pyrmajā raidejumā “Sajūti LATGALI” tiks skaidruots, kaids tod eistyn ir latgalīšu volūdys statuss Latvejā. Koč i vaļsts volūdys lykums nūsoka, ka vaļsts aizsorgoj i atteistej latgalīšu volūdu, tok kasdīnā vēļ ir daudz doromuo, kab lauztu stereotipus i latgalīšu volūdu skaiteitu par pylnvierteigu myusu vysu volūdys sastuovdaļu. Raidejums gastēs Kuorsovys nūvodā, kur kasdīnā latgaliski runoj apmāram 90% dzeivuotuoju i kurā pošvaļdeiba ir pastatejuse īlu nūruodis i latvīšu literarajā volūdā, i latgalīšu rokstu volūdā. Raidejumā redzīni par itū temu izsaceis filologi, jurists, pošvaļdeibu i Vaļsts volūdys centra puorstuovi. Pyrmuo raidejuma vadeituojs byus popularuos latgalīšu grupys “Dabasu Durovys” liders Arņs Slobožanins.

Tuoluokajuos nedeļuos raidejumūs tiks stuosteits par Latgolys viestnīceibu GORS, folklorys kūpu “Svātra”, jaunīšu aktivitatem Rēzeknis i Cyblys nūvodūs, kai ari Daugovpilī. Byus stuosti ari par katuoļticeibu Latgolā, mozuokumtauteibu integraceju, muokslu, Latgolys eipašajom tradicejom, svātkim, arheologeju Latgolā. Raidejumi “Sajūti LATGALI” stuosteis ari par lauksaimisteibu i uzjiemeigim cylvākim, kurī kasdīnā atteistej Latgolys regionu.

Raidejumu vadeituoji byus atraktivi Latgolys jaunīši Arņs Slobožanins, Oskars Bērziņš i Ļuba Salekalne.

Raidejumu pīduovoj naatkareiguo producentu grupa “Studija 3KM”. “Studija 3KM” mierkis ir popularizēt latgaliskuos kulturys vierteibys, veidojūt konkurētspiejeigus i kvalitativus video raidejumus, eiskinys, reklamys Latgolā, īsaistūt i informejūt pylsūniskū sabīdreibu. Veiduot socialū dialogu, styprynojūt socialū kohezeju, pylsūniskū aktivitati, storpkulturu dialogu i personeigū izaugsmi.

Raidejuma režisors i operators Juoņs Rimicāns, operatore i producente Sandra Poplavska-Rimicāne, producenta paleigs Teņs Bikovskis, skaņu inženers Juoņs Staris.

Komentari slāgti.