30. novembrī 19.00 Latgolys viestnīceibā GORS iz 10 godu jubileja koncertu aicynoj grupa “Baltie lāči”, viestej informaceja latgalesgors.lv.

Svietejūt muokslinīciskuos darbeibys desmit godu jubileju, grupa “Baltie lāči” 2016. godā braukuse koncertturā nu Latgolys pi sovu klauseituoju da dzintarjiurys krostu, Vydzemis pakolnu i Zemgalis leidzonumu. Jubileja goda nūslāgumā grupa prīcynuos sovus klauseituojus ari Rēzeknē iz Latgolys viestnīceibys GORS Leluo zala skotuvis.

Jubileja koncertprograma radeita, īlīkūt desmit godu laikā sakruotū pīredzi, dzīsmis i klauseituoju mīlesteibu. Koncertā skanēs tautysdzīsmis, autordzīsmis i ari klasiskuos muzykys skaņdorbi, tai aplīcynojūt muziku profesionalitati i daudzpuseibu.

Jau īprīkšejā sezonā grupys “Baltie lāči” programys “Akustika” i “Bez lieka trokšņa” daudzūs Latvejis kulturys nomūs aplīcynuoja, ka, atsasokūt nu elektronikys i pastyprynuotuoju, vīnkuoršs muzykys instrumentu skaniejums i bolss vyslobuok sasnādz klauseituoju sirds.

Prūtams, jubileja goda leluokajā koncertā “Baltie lāči” prīcynuos ar tautā īmīļuotom i zynomom dzīsmem – “Skaidruo volūda”, “Mātēm”, “Pār Baikāla drūmajām stepēm”, “Pacel glāzi priekā”, kai ari jaunom pošu grupys dalinīku radeitom i aranžātom dzīsmem. Koncertā Latgolys viestnīceibā GORS pīsadaleis ari grupys “Ginc un Es”, “Dricānu dominante”, solistu apvīneiba “Jubilāri” (Andris Baltacis, Aldis Kise, Andris Eriņš, Gints Ločmelis) i cyti.