Muokūņkolnā nūtiks skriejīņs “Stirnu buks”

LaKuGa 16. Septembris, 2016. gods Comments Off on Muokūņkolnā nūtiks skriejīņs “Stirnu buks”

plakats-2016_makonkalnsa3Sastdiņ, 24. septembrī, pyrmūreiz Latgolā nūtiks stygu skrīšonys seriala “Stirnu buks” pūsmys ar startu i finišu pošā Rāznys azara krostā. Bez skrīšonys Lipuškūs paradzāts ari omotnīku tierdzeņš, rodūšuos darbneicys i cytys aktivitatis, tymā skaitā apmaklātuojus prīcynuos ari grupa “Gandreiž 10nīkā”, folklorys draugu kūpa “Vīteri” i Sovvaļnīks, informej pasuokuma organizatori.

Mudru popularitati īmontuojušuo stygu skrīšonys seriala “Stirnu buks” skriejīni nūteik izcili ainovyskuos Latvejis vītuos! Itūgod jau nūtykušys saceņseibys Rīkstukolna, Gaujis Nacionaluo parka, Ventys uplejis, Talsu paugurainis i Uožu kolna mistereju pylnajūs i ainovyski boguotajūs meža ceļūs i stidzeņuos, nu piec Muokūņkolna pūsma sezona tiks nūslāgta 22. oktobrī, vaicojūt teiksmainū Beverinys piļskolnu Valmīrys pusē.

Kotrys nu 7 stygu skriejīnim ir atseviškys saceņseibys, tok dalinīkim ir vareiba ari sovstarpeigi sasaceņst skriejīņu seriala kūpviertejumā. Juodasoka, ka vysdreižuok, ka sova nūvoda trasē vodūšūs skriejieju trejnīkā atsagrīzs ari Nagļu pogosta skriejiejs Andrejs Jesko.

Saceņseibu formats – pateikama izklaide dīnys garumā vysai saimei! Nu 10 stuņžu Lipuškūs skriejiejus i gostus prīcynuos omotnīku tierdzeņš, rodūšuos darbneicys, rūtalis i aktivitatis vysys dīnys garumā. 11.50 i 12.50 muzicēs grupa “Gandreiž 10nīkā”, 14.00 prīcynuos folklorys draugu kūpa “Vīteri”, nu 15.30 pasuokuma muzykalū daļu nūslēgs Sovvaļnīks.

Skriejīņs tiks aizvadeits 5 distaņcēs. Bārni da 10 godu vacuma skrīs apmāram 1 km (“Susurs”), nu leluoki skriejieji var puorbaudeit sovus spākus distaņcēs “Vāvere” (ap 6 km), “Zaķis” (ap 11 km), “Stirnu buks” (ap 25 km) i “Lūsis” (ap 36 km).

Vītejais stygu zynuotuojs, latgalīšu muzikis i sabīdryskais darbinīks Guntis Rasims aicynoj skriejiejus piec sprinta etapa, kas eisi pyrma finiša vess Muokūņkolnā, pamest skotu Rāznys azara vierzīnī. “Viersyunē vajag puors sekuņdis atviļkt elpu i uzjimt kaidu pašeiti iz dobysskotu apsavieršonai izcaltuos platformys, nu kuruos pasaver īspaideiga ainova,” soka Rasims. “Doba ite ir cytaiduoka nakai puorejā Latvejā. Rāznys azaru varēs redzēt na tik piec starta i finiša, nu ari distaņcis laikā skriejieju redzīnim pasavērs vīns nu Latvejis leluokūs azaru. Trasē nabyus nivīna ploskona gobola – reljefs vysu laiku mainuos, trase vysu laiku vess augšā i lejā, tok bez mudru kuopumu voi krytumu,” soka Guntis, kurs pats regulari pīsadola “Stirnu buks” saceņseibuos.

Registraceja saceņseibom škārsteiklā da catūrtdīnis, 22. septembra, 12.00. Pādejuos šaļts registraceja byus īspiejama ari saceņseibu dīnys reitā pyrma starta, nu vysmoz 30 minutu pyrma attīceiguos distaņcis suokuma.

Komentari slāgti.