11. septembrī Naujinis pogosta Juzefovys parkā nu jau pīktū reizi nūtyka folklorys kūpu sasadzīduošonys pasuokums “Atvasara Juzefovā”, informej Naujinis kulturys centra vadeituoja Olga Kuzmina.

Viesturiskajā Juzefovys parkā iz rodūšuom izdareibom i sasadzīduošonu puļcejuos 10 kolektivi nu vairuoku nūvodu. Pasuokumā pīsadaleja Daugovpiļs nūvoda kolektivi – Naujinis kulturys centra folklorys kūpa “Rūžeņa” (vad. I. Zeile), Dubnys pogosta folklorys kūpa “Atzola” (vad. M. Umbraško), Neicgaļa pogosta folklorys kūpa “Neicgalīši” (vad. I. Bozoviča), Skrudalinys pogosta vokalais ansamblis “Līgaviņas” (vad. R. Almakajeva), Daugovpiļs LKC folklorys kūpa “Svātra” (vad. S. Teivāne), Kruoslovys nūvoda kolektivi – Iudreišu pogosta folklorys kūpa “Rudzutaka” (vad. A. Tuče), Izvolta bārnu folklorys kūpa “Mozī Latgalīši” (vad. S. Stivriņa), Aglyunys folklorys kūpa “Olūteņš” (vad. M. Bicāne), Krystpiļs kulturys noma krīvu vokalais ansamblis “Bariņa” (vad. O. Agafonova) i tuolī gosti nu Kūrzemis pusis – Nīcys etnografiskais ansamblis (vad. L. Zeile).

Pasuokuma dalinīkim i apmaklātuojim beja vareiba nūbaudeit duorza “stypruokuo” duorziņa – casnāga – varonū garšys spāku, īvyngrynuot pierstus muola veiduošonys darbneicā, puorbaudeit sovys atminis spiejis i zynuošonys lelformata atminis spēlē “Latvju zīmes”, kai ari ar taustis paleidzeibu atpazeit kasdīnā lītojamūs putruomus i tūs izstruoduojumus.

Naujinis kulturys centra kolektivs pasasoka Casnāgu Darbneicai Armanda Korženevska personā i Ilonai Abdulajevai par darbneicu organiziešonu, Ilmāram Locikam par atbolstu gostu uzjimšonā, Reginai Prohovskai par gordū mīlastu, Valdim Grebežam par ārtū deju greid, Naujinis nūvodpietnīceibys muzeja kolektivam par pasuokuma dalinīkim pīduovuotū vareibu apsavērt muzeja ekspoziceju “Slutišķu vecticībnieku māja”. Paļdis Naujinis pogosta puorvaļdis kolektivam par atbolstu pasuokuma reikuošonā, Daugovpiļs nūvoda dūmei par finansiejuma pīškieršonu i dūmis prīšksādātuojai Janinai Jalinskai par kluotbyutni pasuokumā.