Latgolā nūtiks Juoņa Ivanova jubileja koncerti

LaKuGa 22. Septembris, 2016. gods Comments Off on Latgolā nūtiks Juoņa Ivanova jubileja koncerti

Oktobris Latgolā tiks aizvadeits komponista Juoņa Ivanova 110. jubileja zeimē. Svietejūt jubileju, Latgolys viestnīceibā GORS, Juoņa Ivanova Rēzeknis muzykys vydsškolā i Latgolys muzykys školuos nu 4. da 19. oktobra tradicionalajuos Juoņa Ivanova muzykys dīnuos nūtiks vairuoki komponistam, izcylajam simfonikam veļteiti koncerti, informej Latgolys viestnīceibys GORS marketinga nūdalis vadeituoja Edeite Husare.

Natuoli nu Preilim 1906. goda 9. oktobrī dzymušais komponists Juoņs Ivanovs ir palics par Latvejis kulturys kanonu. Juo simfonejis i skiciejumi viestej par Latgolys dobu i cylvāka puordzeivuojumim, sarežgeitim dvēselis i gora konfliktim, komponista dorbi teik skaiteiti par vīnu nu zynomuokajim latvīšu simfoniskuos muzykys paraugim, ar sovu novatorismu, nu reizē ari skumeiga lirika dobu jis vys vēļ dzeivoj muziku mutvuordu folklorā. Juoņs Ivanovs ir komponists, kurs saceriejs divdesmit vīnu simfoneju i lics pamatus latvīšu kompozicejis školai, bejs profesors Latvejis Vaļsts konservatorejā, struoduojs Latvejis Radiofonā kai skaņu režisors, bejs simfoniskuo orkestra dirigents, Latvejis Radejis raidejumu i televizejis komitejis muokslinīciskais vadeituojs, kai ari sajiems naskaitomys premejis.

Juoņa Ivanova Muzykys dīnys teik svieteitys nu 1983. goda i itūgod komponista jubilejs tiks svieteits vysā Latgolā: 4. oktobrī iz kamerkoncertu Latgolys viestnīceibys GORS Mozajā zalā aicynoj Jezupa Veitula Latvejis Muzykys akademejis vuiceibspāki i magistranti, kab ar Juoņa Ivanova i Antonīna Dvoržāka muzyku i profesora Venta Zilberta īvodvuordim suoktu jubileja koncertu sereju. 9. oktobrī, kas ir taišni komponista Juoņa Ivanova dzimšonys dīna, Latgolys viestnīceibys GORS Lelajā zalā Rēzeknis kamerorkestra (dirigents Juoņs Stafeckis) atskaņuojumā izskanēs diveji komponista leldorbi – Koncerts čellam ar orkestri, kurā soliste byus izcyla Šveicē dzeivojūša latvīšu muzike Gunta Ābele, i 6. simfoneja, kurū pats komponists ir nūsaucs par Latgolys simfoneju. Simfoniskuos muzykys koncertu varēs nūsaklauseit ari Latvejis Radejis 3 “Programma Klasika” eterā.

Komponista gūdynuošonai eipaši gatavejās ari juo vuordā nūsauktuos Juoņa Ivanova Rēzeknis muzykys vydsškolys audziekni i pedagogi: 12. oktobrī JIRMV izskanēs audziekņu koncerts “Veltījums”, nu 13. oktobrī Ludzys muokslys školā, 18. oktobrī Zylupis muzykys i muokslys školā, 19. oktobrī Baļtinovys muzykys i muokslys školā i Kuorsovys muzykys i muokslys školā izskanēs koncertprograma “Zināmais un nezināmais Jānis Ivanovs”. Taipat Ivanova 110. jubileja zeimē 25. novembrī Juoņa Ivanova Rēzeknis muzykys vydsškolā tiks aizvadeits jaunūs pianistu konkurss “Latgales skicējums”.

Beleti iz Latgolys viestnīceibā GORS nūteikūšajim koncertim nūpierkami Latgolys viestnīceibys GORS i “Biļešu Paradīze” beletu sistemuos. Beletu cenys 5 – 10 eiro.

Lobuok īsapazeit ar komponistu Juoni Ivanovu paleidzēs Latvejis Radejis raidejums “Kultūras rondo” – “Jānis Ivanovs –  mūzikā un Latvijas kultūrā”

Komentari slāgti.