Pīktdiņ LTV1 ruodeis dokumentalū kinu par Juoni Streiču

LaKuGa 28. Septembris, 2016. gods Comments Off on Pīktdiņ LTV1 ruodeis dokumentalū kinu par Juoni Streiču

streics

30. septembrī 19.25 LTV1 pyrmizruodi pīdzeivuos režisoris Agitys Cānis-Kīlis i scenareja autoris Dairys Uobulenis kina “Mans draugs – Jānis Streičs”. Tyvuokuo mieneša laikā paradzāts ari daudz vysaidu cytu izcylajam režisoram veļteitu nūtikšonu.

Režisors Juoņs Streičs mīļoj akterus, mīļoj cylvākus, dzeivi i Latveju. Ir taids mits, ka jis var struoduot, raksteit voi gleznuot pat tod, ka vysi cyti svietej dzimšonys dīnu voi pat kuozys. Jis muok byut vīnatnē ar sovim kinu i gleznu tālim i byut kūpā ar mums! Cylvāku rūseiba jū natraucej, pat ūtraiž. Cylvāki ir juo muokslys īdvasma, i tū dzeivū i ciļvieceigū var atrast sevkurā juo kinā! Jis zyna na tik sābrus i jūs kasīnu, nu ari sovu draugu draugus i jūs bārnus. Kai saceja juo lītaunīku draugs Vitas, ka ir atbraucs Streičs, ap jū veidojās nūtikšona. Juoņs Streičs dzeivoj storp apbreinuojami interesantim cylvākim, kurim vysim ir breineiga, koč varbyut na vīgla dzeive, taipat kai jam pošam…

Streiča jubileja mienesī turpynojās, kai ari ir paradzātys ari cytys nūtikšonys. Da 20. novembra Reigys Sv. Pītera bazneicā apsaverama gleznu izstuode “Jānis Streičs un viņa draugi”, taipat oktobrī lelveikalā “Galerija Centrs” apsaverama Reigys Kino muzeja veiduotuo ceļojūšuo ekspoziceja “Jānis Streičs: filmas, cilvēki, laikmets”, kas vāluok ceļuos i pa Latveju, i cytom vaļstim.

1.oktobrī Latgolys viestnīceibā GORS nūtiks Juoņa Streiča jubileja koncerts. Tai kai beleti jau izpuordūti, nūtikšonu 7. oktobrī varēs redzēt ari Latvejis Televizejis eterā, kai ari decembra suokuos paradzāti koncerti ari Reigā.

Oktobrī režisors tyks gūdynuots ari Nacionaluo kinu festivala “Lielais Kristaps” ītvorūs, kur jam tiks padūta bolva par myuža īguļdejumu. Jau atkluošonys gūda seansā tiks ruodeita Juoņa Streiča kina “Svešās kaislības”, iz leluo ekrana festivala laikā tiks ruodeita ari kina “Mans draugs – nenopietns cilvēks”. Nu 3. oktobra tierdznīceibys parkā “Alfa” byus apsaverama izstuode, kas veļteita Juoņa Streiča attīceibom ar festivalu “Lielais Kristaps”.

20. oktobrī Reigys Storptautyskuo kinofestivala ītvorūs Reigys Kino muzejs reikuos zynuotnisku konferenci “Jānis Streičs un laikmetu zīmes”, kur par jubilara daiļraidi referēs vysaidu jūmu zynuotnīki, taipat iz leluo ekrana tiks ruodeita vīna nu rešuok radzātuom Streiča kinom “Carmen Horrendum”.

Sovukuort goda beiguos paradzāts izdūt Dairys Uobulenis gruomotu “Jāņa Streiča maģiskais reālisms. 22 filmas”.

Komentari slāgti.