Rēzeknē sasatyka ar rakstneicu Moniku Zīli

LaKuGa 28. Septembris, 2016. gods Comments Off on Rēzeknē sasatyka ar rakstneicu Moniku Zīli
Rēzeknē sasatyka ar rakstneicu Moniku Zīli

22. septembrī Rēzeknis Centralajā bibliotekā (RCB) gasteja nūvodneica rakstneica Monika Zīle. Iz sasatikšonu ar rakstneicu beja īsaroduši daudzi juos talanta cīneituoji, bibliotekys pastuoveigī apmaklātuoji, skaiteituoji, vītejī dzejnīki, radinīki, klasisbīdri i bibliotekys skaiteituoju klubeņa “Lasis” dalinīki, informej RCB direktoris vītneica Ruta Suseja.

Pasuokuma īvoddaļā bibliotekys direktore Marija Sproge pastuosteja par M. Zīlis daiļradis suokumu, kas saistuos ar pyrmajom publikacejom vītejā presē: 1958. goda 23. marta laikroksta “Ausma”  literarajā puslopā beja īlykts M. Jačukys, pyrmuos vydsškolys škoļneicys, dzejūļs ar nūsaukumu “Mūsu universālveikals”. M. Sproge runuoja par M. Zīlis gruomotom Rēzeknis Centralajā bibliotekā, pastreipojūt tū, ka gruomotys ir skaiteituoju īmīļuotys i vys vēļ pīpraseitys, par kū līcynoj tūs nūlītuojums. Daudzu godu garumā skaiteituoju iņterese par tom nasamozynoj.

Sasatikšonys reizē M. Zīle atsaceja iz vaicuojumim, kū beja sagatavejuši skaiteituoji i bibliotekaris. Vysu pyrma beja vaicuojums par rakstneicys bierneibu Rēzeknis pusē i školys godim. Skaiteituoji iņteresejuos, kur rakstneica sajam idejis daudzū gruomotu sižetim i varūnim, nu klauseituoju vyda izskanēja vaicuojumi par gruomotu raksteišonu latgalīšu volūdā i tulkuojumim krīvu volūdā. Ite juodasoka, ka M. Zīle saguojušūs klauseituojus lutynuoja ar dzydru i skaneigu latgalīšu valodu, i ar juos aizrauteiguos stuostneicys talantu pusūtra stuņde aizritēja namonūt.

Sasatikt ar M. Zīli beja īsarodušys juos klasisbīdrinis Vilhelmine Čača i Doloresa Svikle. Pasuokumu kuplynuoja Veremu folklorys kūpys “Vōrpa” sīvu i veiru skaneigī bolsi kūpys vadeituojis Sarmeitis Strupovičys akordeona skaņu pavadejumā.

Rakstneicu sveice dzejneica, daudzu bārnu gruomotu autore Leontine Apšeniece i dzejis almanaha “Rēzekne” sastateituoja, dzejneica Olga Orsa, kas rakstneicai izduovuoja jaunuokū dzejis almanaha “Rēzekne” kruojumu.

Sirsneiga šaļts beja rakstneicys M. Zīlis sasatikšona ar sovu školys godu bibliotekari, školuotuoju Aleksandru Gribusti, kuruos 90 godu slīksnis nabeja traucējs atīt iz sasatikšonu i sajimt autografu nu rakstneicys.

Sabīdryskais darbinīks i Rēzeknis Gūda pylsūņs Pīters Keišs rakstneicai reizē ar jaunu, rodūšu īceru vieliejumim izduovuoja jaunuokuos Latgolys Kulturys centra izdevnīceibys gruomotys.

Komentari slāgti.