DVD “Viļakys ticiejumi” viļacuonim i jūs gostim

LaKuGa 26. Oktobris, 2016. gods Comments Off on DVD “Viļakys ticiejumi” viļacuonim i jūs gostim

21. oktobrī Viļakys kulturys nomā nūtyka bilingvala izzinis i vuiceibu DVD “Viļakys ticiejumi” prezenaceja, informej DVD scenareja autore Ilga Šuplinska.

2014. goda vosorā tūlaik Rēzeknis Augstškolys studenti, kai ari cytu Latvejis i Ukrainys augstškolu puorstuovi beja folklorys ekspedicejā Viļakā. Interesi par Viļaku radeja gon fakts, ka ite dorbojās vasali treis ar folklorys tradicejom saisteiti kolektivi: etnografiskais ansambļs “Abrenīte”, folklorys kūpa “Atzele”, krīvu dzīšmu ansambļs “Sudaruška”, gon ari tys, ka Viļakys pusē jau vairuoku dasmitu godu garumā dobu vāroj i sovus ticiejumus pīroksta Viļs Bukšs.

Ekspedicejis laikā tyka savuokts puori par 700 ticiejumu vīņ, bet ekspedicejis dalininīki beja puorsteigti gon par garūs dzīšmu, bolsu i pusbolsu dzīduošonys tradiceju, gon ari par bogoteigū dzīšmu pīrokstu pyuru, kū īgiva sarunuos ar vītejim īdzeivuotuojim.

DVD “Viļakys ticiejumi” apkūpoj ekspedicejis dalinīku redziejumu par Viļaku i viļacuonim, itai vītai rakstureigajom tradicejom. Atsevišķa filmys daļa ir veļteita ticiejumu žanra izpratnei i ilustriešonai ar pīvadumim nu Viļakys stuostejumim i dzīduojumim.

Kai prezentacejis pasuokumā atzyna Viļakys nūvoda dūmis prīšksādātuojs Sergejs Maksimovs, tod filmys veiduotuoji (scenarejs – I. Šuplinska, video – M. Justs, D. Veckalniņš) zynomā mārā dora dūmis dorbu, veidojūt popularizejūšu materialu par Viļakys nūvodu, izceļūt tuos vierteibys, ar kurom viļakīši lepojās i ir pamanomi kūpejā Latgolys kulturys i dobys ainovā.

DVD tyka duovynuots vysim, kas ekspedicejis laikā pasadaleja ar senču tradiceju zynuošonom, kai ari Viļakys nūvoda dūmei prezentacejis vajadzeibom. Disks tiks duovynuots ari cytom Latgolys regiona školom, muzejim, bibliotekom, papyldynojūt materialu kluostu par Latgolys kulturvidi i guodojūt par vuiceibu materiala sagatavuošonu nūvodvuiceibai, interešu izgleiteibai, kas sasiteita ar latgaliskuos identitatis, volūdys apgyvi.

Diska izdūšonu finansiali atbaļsteja vaļsts pietejumu programys “Letonika” projekts “Vierteibu aspekti Letonikā”, kai ari Izgleiteibys i zynuotnis ministreja i Rēzeknis Tehnologeju akademeja.

Komentari slāgti.