Nūtiks Inetys Atpilis-Juganis gruomotys attaiseišonys svātki

LaKuGa 31. Oktobris, 2016. gods Comments Off on Nūtiks Inetys Atpilis-Juganis gruomotys attaiseišonys svātki
Nūtiks Inetys Atpilis-Juganis gruomotys attaiseišonys svātki

12. novembrī Rēzeknē, Latgolys kulturviesturis muzejā (Atbreivuošonys alejā 102) nu 12.00 da 16.00 nūtiks dzejneicys Inetys Atpilis-Juganis dzejūļu gruomotys “Mūdynuot muokuļus” attaiseišonys svātki, informej dzejneica.

Gruomotys dzimšonys dīna ir duovona pošai autorei dzimšonys dīnā i ari skaiteituojim. Dzimšonys dīna kai dzimšonys dīna – svātki vysys dīnys garumā – autore gaideis gostūs, kab ar kotru nu interesentu byutu laiks sarunai, tik jam nūskaiteitam dzejūļam, kūpeigai kopeja kružkai i autoris gataveitam muokuļpeirāga gabaleņam. Kab ir kūpā byušonys prīca, kuo bīži viņ datryukst publiskā pasuokumā i kasdīnys skriejīnī.

“Mūdynuot muokuļus” ir autoris catūrtuo dzejis gruomota (“Neatburtā uguns” (2001), “Reveranss. Sarkans uz sarkana” (2008), “Otkon giunu sapynus” (2015)), ūtrei dzejis gruomota latgalīšu volūdā. Gruomotā īkļauti dzejneicys 100 dzejūli latgaliski, partū ka tyvojūtīs Latgolys kongresa symtgadei i Latvejis vaļsts symtgadei itaids literars rezultats, ruodīs, ir cīši lykumsakareigs i vajadzeigs kai aplīcynuojums, ka latgalīšu volūda kai jaunradis volūda ir boguota, stypra i napagaisynojama. Sova. Jaunuo gruomota i autoris redzīņs byus par vēļ vīnu pīruodejumu i aicynuojumu runuot, dūmuot, just, skaiteit, mīļuot, radeit i dareit daudz kū cytu latgaliski.

Gruomota byus puorsteigums ari nu dizaina pusis, partū ka byus eistynuojusēs autoris īcere izveiduot muokslinīciski augstvierteigu gruomotu, kur kotrys dzejūļs atrads sovu sajiutu ilustraceju Aritys Atpilis-Donys fotografejā. Moz tuo gruomotys dizains puorsteigs na tik ar fotografejom, nu ari ar “muokuļaineibu”.

“Kab i tev datyktu nu munu muokuļu pa gabaleņam!” – tai skaiteituojim sovā jaunajā gruomotā nūvielej Ineta.

Gruomota radeita ar Vaļsts kulturkapitala fonda, LR bīdreibys latgaliskūs projektu, Latvejis vaļsts mežu atbaļsteituos Latgolys kulturys programys 2016 atbolstu. Gruomotu izdavuse Latgolys entuziastu grupa “Biļdis”, tei radeita SIA “Latgales Druka”

Kartenis autore: Arita Atpile-Dona

Komentari slāgti.