Luočplieša dīnā Bolvūs ruodeis kinu “Segvārds Vientulis”

LaKuGa 10. Novembris, 2016. gods Comments Off on Luočplieša dīnā Bolvūs ruodeis kinu “Segvārds Vientulis”

Pīktdiņ, 11. novembrī, 18.00 Bolvu Sakraluos kulturys centrā tiks ruodeita režisora Normunda Puča kina “Segvārds Vientulis”, kas viestej par Vonogu draudzis prīsteri Ontonu Juhneviču.

Kinys centrā ir prīstera Ontona Juhņeviča īkšejais konflikts storp gareidznīka morāli ētiskajim uzstuodejumim i patriotisma jiutom, kas līk jimt rūkā īrūci, lai aizstuovātu Tāvzemi i Bazneicu laikā, kod Latgolā atsagrīž padūmu okupacejis režims.

Vonogūs Ontona Juhņeviča vuords nu cylvāku atmiņom nav pagaiss – par tū līcynoj pīminis plāksne pi Vonogu bazneicys sīnys, nūruode iz tū Vonogu centrā, ekspoziceja Vonogu pamatškolys muzejā, pīmineklis Augšmuktūs Latvejis breiveibys idejis aizstuovim piec Ūtruo pasauļa kara – Latvejis Tāvzemis sorgu (partizanu) apvīneibys izveiduotuojim, vadeituojim i īdvasmuotuojim.

Kinys scenarejs tops sadarbeibā ar viesturnīkim Juoni Viļumu, Inesi Dreimani i Ritvaru Jansonu.Kinā tāloj profesionali aktīri – Vairis Piņķis, Vilis Daudziņš, Ieva Aniņa i cyti. Kinā dzierdama ari latgalīšu volūda.

Režisoram Normundam Pucim, kurs ir ari scenareja autors, itei ir debeja kina.

Muzyku kinai sarakstejs storptautiski atzeitais latvīšu goreiguos muzykys komponists Rihards Dubra.

Komentari slāgti.