Grupa “Trešīs Ņutona lykums” pīduovoj jaunu dzīsmi i video

LaKuGa 23. Novembris, 2016. gods Comments Off on Grupa “Trešīs Ņutona lykums” pīduovoj jaunu dzīsmi i video

Jaunu dzīsmi “Muns / Muna” pīduovoj grupa “Trešīs Ņutona lykums”.

Video filmāts Rēzeknis nūvoda Ančupānūs, izmontojūt vīna kadra fiļmiešonys tehniku. Ideja ir grupys pošys izdūmuota i realizāta. “Ar videoklipu gribēm paruodēt, cik relativys var byut taidys laika i telpys dimensejis kai paguotne, tagadne i nuokūtne, ka iz jom pasaver drusku nu molys. Dzīsme suokumā var ruodeitīs muoneigi dryuma, tok tai nav. Dzīsmē, taipat kai klipā, teik apraksteitys laika i telpys dimensejis, nu cylvāku attīceibuos, i kai juos ītekmej cylvāku īkšejūs pasauļus,” soka “Trešīs Ņutona lykums”.

Par daleibu klipā i rudiņa soltumu iztureibu grupa gryb pasaceit paļdis “mozuom aktrisem”.

Paradzāts, ka itys grupai nabyus pādejais atguodynuojums par sevi itymā godā. “Trešīs Ņutona lykums” sūlej godu nūslēgt iz kaidys jautruokys nūts, kai tyka īsuokts.

Grupa suokuse sovu ceļu 2013. goda 18. septembrī Rēzeknē. Tamā dorbojās 5 mārgys nu Rēzeknis nūvoda. Ir gona lela pīredze vysaidūs jaunūs grupu festivalūs i konkursūs. Nūsaukums “Trešīs Ņutona lykums” nav najauši pajimts – tys ir “darbeibys i pretdarbeibys lykums”, kas cīš truopeigi atainoj taišni grupys sīviškeigū byuteibu. Grupa niu taisa i roksta pošu sacarātuos dzīsmis i sūlej pa druskai juos ruodeit publikai.

Komentari slāgti.