Izdūts romans par Fraņci Kempu

LaKuGa 30. Novembris, 2016. gods Comments Off on Izdūts romans par Fraņci Kempu

aizlauztais-spaits_vaksIzdūta Sandrys Ūdris i Juoņa Ryučāna gruomota “Aizlauztais spaits” – Fraņča Kempa dzeivis atspeidumi.

Izcyluo latgalīša dzeivis atspīdynuojumi īcarāti kai veļtejums juo jubilejā Vaļsts Kulturkapitala Latgolys kulturys projekta “Fraņča Kempa 140 godu atceris pasuokumi“ aktivitatēs (vadeituoja Ilga Šuplinska). F. Kemps (1876–1952) ir dzims taišni Zīmys saulis grīžkūs, juo dareitī dorbi bīži saisteiti ar gaismys vuordu – koč voi pyrmuos latgalīšu avīzis “Gaisma“ (1905) izdūšona. Partū juo dzeive īdūmuota kai gaismys spaits, aizlauzts pret vysaidim liktiņa škieršlim.

Tī, kas gaida smolku juo biografejis faktu i vysu padareitūs dorbu izkluostu, byus veilušīs. Deļ ituo var skaiteit M. Bukša dorbus, O. Rupaiņa romanu “Tauta grib dzeivuot“ par latgalīšu atmūdu 19. i 20. g. s. mejā. Viļsīs ari tī, kas gaidejuši vysu varūša heroja tālu. Personeibu oklai idealizēt ci īmeit dubļus var viņ, atsatuolynojūt nu juos. Tyvumā vyss palīk ciļvieceigs, autori gribiejuši pādejuo.

Intriga (meilys treisstyurs) ir mozajā kūka žvūrgzdineņā, kas liktineigi saista Fraņci ar juo dzeivis liktineigajom sīvītem, kompozicejai soveigs fragmentarisms – tuos ir atseviškys epizodis, izvārstys ar asociacejom, īguodom, epizodiskim tālim, nūskaņu, ci Fraņča viestulis.

Tikšonuos ar gruomotys raksteituojim paradzātys:

30. novembrī 19.00 Lūznovys muižā (Andrejdīnys pasuokumā);

11. decembrī 13.00 pi bīdreibys “Trešuo zvaigzne“, Reigā, Slūkys īlā 37;

15. decembrī 14.00 Cyblys tautys nomā, Cyblā.

Komentari slāgti.