Izsludynuoti konkursi par radejis i TV raidejumu veiduošonu Latgolā

LaKuGa 20. Decembris, 2016. gods Comments Off on Izsludynuoti konkursi par radejis i TV raidejumu veiduošonu Latgolā
Izsludynuoti konkursi par radejis i TV raidejumu veiduošonu Latgolā

Nacionaluo elektroniskūs plošsazinis leidzekļu padūme (NEPLP) izsludynuojuse div konkursus par raidejumu veiduošonu 2017. godā Latgolys regionalajūs i vītejūs elektroniskajūs plošsazinis leidzekļūs, kas raida radejis i TV programys.

Konkursu prīškmats ir kulturys i sabīdriski politisku radejis i TV raidejumu (latviski/latgaliski) veiduošona Latgolys regionā sabīdreibys salīdiešonys, nacionaluos identitatis i vaļsts volūdys pozicejis nūstyprynuošonys pasuokumu ītvorūs.

Konkursa kūpejais finansiejums ir 71 142 eiro (kotrā konkursā – 35 571 eiro). Sabīdryskais pasyutejums dūmuots regionalajim i vītejim elektroniskajim plošsazinis leidzeklim i producentu grupom Latgolys regionā.

Saskaņā ar konkursa nūlykumu, pretendentim dokumenti NEPLP juoīsnādz da 28. decembra.

Konkursā aicynuoti pīsadaleit regionalī i vītejī elektroniskī plošsazinis leidzekli (radejis i televizejis), kas atsarūn (juridiskais adress) Latgolys planavuošonys regionā, kai ari Latgolys kulturviesturiskajā teritorejā, i producenti voi producentu grupys, kas nūslāgušys nūrunu par raidlaiku regionalajajuos i vītejuos radejuos, kas atsarūn Latgolys planavuošonys regionā, kai ari Latgolys kulturviesturiskajā teritorejā.

Ar konkursu nūlykumim var īsapazeit NEPLP sātyslopā.

Komentari slāgti.