Daugovpilī atkluos muokslineicys Sanri personalizstuodi

Daugovpilī atkluos muokslineicys Sanri personalizstuodi

5. janvārī 16.00 Latgolys Centraluos bibliotekys abonementā (Reigys īlā 22a, 2. stuovā) tiks atkluota muokslineicys Sanri personalizstuode “bez nosaukuma”, informej bibliotekys puorstuove Inga Gedžūne. Izstuodis dorbi ir radeiti laikā nu 2009. da 2016. goda i reizē tiks izstuodeiti pyrmū reizi.

Jaunuos, talanteiguos muokslineicys Sanri (Sandrys Poplavskys-Rimicānis) interešu i aizaraušonu lūks ir cīši lels – gleznīceiba, keramika, instalacejis, video i fotografeja. Muokslu Sanri ir studējuse Daugovpiļs Universitatis Muzykys i muokslys fakultatē i Latvejis Muokslys akademejā, kur sajēme magistra gradu konceptualajā gleznīceibā. Ir Latvejis Muokslinīku savīneibys i Daugovpiļs regiona muokslinīku asociacejis bīdre. Nu 2004. goda aktivai pīsadola grupu izstuodēs, reikoj ari personalizstuodis. Ir bejuse vairuoku izstuožu i muokslys projektu kuratore. Itūšaļt struodoj studejā 3KM, veidojūt muzykys klipus, TV raidejumus (“Sajūti Latgali”, radūšus reklamys i marketinga projektus, ari latgalīšu volūdys apvuiceibu video “Runuosim latgaliski”.

Izstuodē “bez nosaukuma” īkļautī dorbi teik izsaceiti ar vysaidom kruosom i fakturom, zynomom formom i tālim. Skaidrojūt izstuodis lakoniskū i nūslāpumainū koncepceju i lāmumu tū veiduot “bez nūsaukuma”, muokslineica soka: “Namīļoju runuot par sovim dorbim, kai ari, parkū es tū doru i kas ir radzams munūs dorbūs. Lai dorbi poši runoj.” Piec Sanri dūmu dorbu nūsaukumi skateituoju īlīk nūsaceitūs ramūs i naļaun fantazēt, partū itūreiz muokslineica nūsprīduse ļaut kotram skateituojam pošam datikt pi sova stuosta.

Izstuode “bez nosaukuma” byus apsaverama Latgolys Centraluos bibliotekys laseitovā i abonementā da 31. janvara dorba dīnuos nu 11.00 da 20.00 i sastdīnēs nu 10.00 da 17.00.

Print Friendly, PDF & Email