Rēzeknē apsaveramys 300 ābecis nu Jura Cybuļa kolekcejis

LaKuGa 4. Janvars, 2017. gods Comments Off on Rēzeknē apsaveramys 300 ābecis nu Jura Cybuļa kolekcejis
Rēzeknē apsaveramys 300 ābecis nu Jura Cybuļa kolekcejis

Da 4. februara Latgolys Kulturviesturis muzejā (Atbreivuošonys alejā 102, Rēzeknē) apsaverama ābeču izstuode nu Jura Cybuļa kolekcejis, informej muzejpedagoge Inese Ločmele-Jansone. Izstuodē var īpazeit 300 ābecis vysaiduos volūduos, izzynuot, cik lela ir Ginesa rekordu gruomotā atrūnamuo vysmozuokuo ābece pasaulī, kaidys ir leluos, skanūšuos, naparostuos ābecis, kas ir burtu māri i kaidys ir Latvejis ābecem veļteituos monetys.

Ābeču kolekcionara, vairuoku gruomotu autora Jura Cybuļa kolekcejā itūšaļt ir vaira par 9500 vīneibu nu 219 zemem 1121 volūdā. Sovā gruomotā “Valodu un tautu brīnumainā pasaule” Jurs Cybuļs roksta: “Kolekcioniešona – tei ir kaisle, aizaraušona. Kolekcejis prīškmatu globuošona – napuortraukti rysynojams praktisks i gryuts aizdavums. Daleišonuos ar informaceju i zynuošonom par vuokumu ar cytim – miseja.” Kolekcionars soka: “Ābece ir tei, kas apvīnoj školu i volūdu, i eistineibā es kruoju volūdys, partū ka ābecis ir vīneigais veids, kai tū var dareit.”

21. janvarī 13.00 kolekcionaru Juri Cybuli varēs satikt Latgolys Kulturviesturis muzejā, kur jis lekcejā “Pasaules tautas, to valodas un ābeces” pasadaleis ar zynuošonom, ceļuojumu stuostim par ābeču ekspedicejom. Īīšonys moksa lekcejā: školānim, studentim – 0,80 eiro, pīaugušajim – 1,50 eiro.

Sovukuort pyrmsškolys izgleiteibys īstuožu audziekni i 1. klasis školāni nu 10. janvara muzejā tiks gaideiti programā “Pašiem sava ābece”. Īīšonys moksa: kotram bārnam 0,80 eiro. Lyugums īprīkš dasasaceit, zvonūt 64622464.

Komentari slāgti.